Panadtaran

Kada buntag malantawan ni Dindo si Almira nga mamisbis sa mga bulak diha sa ilang hardin. Hilig og mga bulak ang dalaga nga matud pa liwat sa inahan nga si Dra. Letty. Guwapa kini si Almira ug duna nay hinigugma nga taga lungsod. Anak sa mayor sa ilang lungsod.

"Hoy, Din, mograduwar ka karong semestera?" ni Almira nga nagpakisayod sa ulitawo. "O, ikaw, mo-graduate pud ka rong semestera, Mir?" misumbalik pud pagpangutana si Dindo sa dalaga.

Miyango si Almira ug nakita ni Dindo nga dunay pahiyom ang mga ngabil sa dalaga. Alang kang Dindo igo na kaniya nga matag higayon magkasultianay sila mopahiyom ang dalaga kaniya. Apan dili na niya palabyon kining higayona karon, iya nang sumbongan si Almira nga dugay na niya kining gimahal.

"Duna na man koy uyab Din si Benhur ug plano gani mi nga magminyo human sa among graduation," hinay ang tingog ni Almira nga wala motan-aw sa ulitawo.

'Mao ba? Sige Mir panghinauton ko ang imong kalipay uban sa binuhat nga imong gihigugma," miigham si Dindo ug unya nananghid nga molakaw.

"Ayaw una’g lakaw Din duna koy ihatag nimo," sa dalaga pa ug gidunol niini ngadto kang Dindo ang usa ka pocket book nga nobela nga nag-ulohan og Gone With the Wind ni Margaret Spencer. "Uy, Gone With the Wind, di ba gisalida man ni sa sine no?" mipahiyom si Dindo.

Milabay ang daghang katuigan ug si Dindo milangyaw sa laing nasud. Dugay siya sa London. Ug sa iyang pagbalik human sa lima ka tuig nagkita sila ni Almira misamot ka guwapa si Almira ug iya dayon kining gipangutana pila nay kids nato Mir?" "Unsa to Din kids? Wala man ko maminyo dalaga pa ko uy si Benhur naminyo og lain wala man sad koy gugma adto niya." "Mao ba aw ako hinuon ulitawo pa pud," mitingsi si Dindo ug namulong "Almira, gitipigan gyud nako ang pocket book nga Gone With Wind kay sayod kong magkita pa kita. Kaingon ko ba'g mahanaw ka nunot sa hangin wala man diay." Ug gikuptan ni Dindo ang kamot ni Almira. (Kataposan)