Lancers, Warriors magtiwas sa Carcar

CEBU, Philippines - Tiwason sa University of the Visayas (UV) Green Lancers ug University of San Carlos (USC) Warriors ang init nilang panagkaribal didto sa habagatang bahin sa Sugbo gumikan kay mopakita sila og aksiyon sa 1st Mayor Nice Apura Inter-Collegiate Basketball Tournament nga gikatakdang  sugdan karong Nobiyembre 4 didto sa Carcar City Sports Complex.

Ang UV ug USC bag-o pang nag-abot sa kampiyonato sa 16th Cebu Schools Athletic Association, Inc. season diin ang Lancers mipalayas sa Warriors sa ilang trono human mipatigbabaw sa ilang best-of-five finals series sa baraha nga 3-1 aron pag-angkon sa una nilang titulo sud sa tulo ka tuig ug ika-11 sa kinatibuk-an sukad niadtong tuig 2000.

Hinuon, ang duha magbangi og usab unya pa sa Nobiyembre 5 gumikan kay managlahi man nga kontra ang ilang harungon sa unang adlaw.  Ang Lancers makigtigi sa University of San Jose-Recoletos  (USJ-R) Jaguars, samtang ang Warriors makighamag sa Cebu Institute of Technology-University (CIT-U) Wildcats sa pasiunang duwa.

Ang laing entranteng koponan mao ang University of Southern Philippines Foundation (USPF) Panthers.

“Malipayon kaayo ko sa mga CESAFI teams nga ilang gidawat ang among imbitasyon. It’s another thing nga maka-gather na  pud ta og daku nga crowd sa maong liga,” matud ni Mayor Nice Apura atol sa usa ka press conference kagahapon sa Sunburst-One Mango.

Si tournament director Julie Flores nagkanayon nga ang mga lagda sa CESAFI dili nila estriktuhon og sunod bisan tuod og ang ilang mga partisipante nagagikan sa maong liga.

“Dili kaayo ta strikto kabahin sa atong rules. Basta na-enroll lang ang usa ka player sa first o second semester sa tunghaan nga iyang girepresentahan, mahimo siya nga makaduwa sa atong liga,” dason pa ni Flores.

Ang lima ka koponan moduwa ubos sa single round robin format. Ang top 2 maoy magtigi sa kampiyonato, samtang ang No. 3 ug No. 4 maoy mag-ilog sa ikatulong dapit.

Ang mokampiyon mobulsa og P50,000, samtang ang mopahiluna sa ikaduha hangtod sa ikaupat nga dapit makadawat og P30,000, P20,000 ug P10,000. (BANAT NEWS)