Pacquiao banat dayo’g training sa U.S.
CEBU, Philippines - Usa ka adlaw human sa iyang pagtaak og balik sa Amerika, wa’y luna sa pahuway nga gitagana si Pinoy ring superstar Manny Pacquiao alang sa iyang kaugalingon gumikan kay sugdan dayon niini ang ikaduhang bahin sa iyang training camp karong adlawa didto sa Wild Card Gym sa Los Angeles.
Uban sa mga sakop sa iyang team nga gipangulohan sa iyang kapikas nga si Jinkee, si Pacquiao (58-6-2, 38KOs) naabot sa LA niadtong Domingo sa gabii ug moadto dayon kini sa gym aron padayonon ang makuti niyang preparasyon nunot sa giatngan niyang away batok WBO welterweight champion Jessie Vargas (27-1, 10KOs) karong Nobiyembre 6 didto sa Thomas & Mack Center sa Las Vegas.
Kuntento na hinuon si Pacquiao sa dagan sa iyang pagbansay-bansay ilabi na kay maanindot ang pagbahin niya sa iyang oras alang sa iyang training ug sa iyang gimbuhaton isip Senador sa Pilipinas.
Susama sab ang gibati sa iyang trainer nga si Freddie Roach nga malipayon kaayo sa gipakitang kakugi sa labing banggiitang boksingero nga ilang nakuptan, kansang abilidad wa’y pagbahar ug wa’y pagkahupas sa iyang panan-aw.
Sa iyang away batok ni Vargas, si Pacquiao naglaraw nga mamahimong usa ka three-time WBO welterweight champion ug ingon man labing unang Senador nga mamahimong world champion sa kasaysayan sa boksing. (BANAT NEWS)
- Latest
