Daan nga aerial ladder truck gipangita

CEBU, Philippines - Tubagon sa pangulo sa General Services Office sa Dakbayan sa Sugbo, Ronaldo Malacora, ang suwat ni Bise Mayor Edgar Labella nga nangita sa aerial ladder truck ug water tanker nga gidonar sa siyudad niadtong 2000.

Gihatagan usab og katin-awan ni Labella ang report sa usa ka pamantalaan nga matud pa ang aerial ladder fire truck nga bag-ohay lang gi-turnover sa siyudad sa Bureau of Fire Protection-7 nga dili kini ang labing una nga ekipo sa siyudad.

Si Malacora niingon nga human nadawat ang suwat sa bise mayor, iya dayon gipatan-aw ang record sa ilang property division diin walay nakitang record apan dunay nitakdo nga serial number nga naa na karon sa motorpool maong ila kining ipasusi kung mao ba kini ang gipasabot ni Labella.

Gipasabot ni Malacora nga ang ilang buhaton gyud unta ang maghupot sa tanang record sa mga donation apan base na sa pakighinabi niini sa BFP-7 nahibaw-an nga wala sila kahinumdum nga duna sila sa maong ekipo.

Giklaro ni Malacora nga ang aerial ladder fire truck nga bag-o lang gi-turnover sa siyudad ngadto sa BFP-7 nga nagkantidad og P57 milyones maoy labing una nga pinakataas nga aerial ladder fire truck sa tibuok Pilipinas. (BANAT NEWS)