D’ Lurics Enterprises, 2-0 na sa Triple-A Christmas League 2016

CEBU, Philippines - Ang offensive rebounds nilang Alexam Amaga ug Opong Englis sa daginutong segundos sa fourth quarter maoy naka-anghel sa D’ Lurics Enterprises nga midaog batok sa Iesieken, 63-59 sa kulbahinam nilang duwa sa Triple-A Christmas League 2016 niadtong Domingo didto sa Kimwa gym sa Barangay Subangdaku, dakbayan sa Mandaue.

Sila si Amaga ug Englis  nagkumboya lang og 11 puntos, apan aduna sila’y tag-siyam ka rebounds nga daku kaayo’g natabang sa kadaugan sa D’ Lurics Enterprises ni team owner Dodong Lurica, kinsa wala makaduwa kagahapon tungod sa injury sa tiil nga iyang naangkon atol sa una nilang duwa.

Ang  high-leaping nga si Rex Gonzaga mitusak og 21 puntos aron mangu sa opensa sa D’ Lurics Enterprises, gisundan ni Geryl Bukiron nga mitampo og 11 puntos ug upat ka rebounds.

Sila si Mai Suson  ug Mendoza mao sab ang nangu sa Iesiken ni Dandy Tagalog nga parehong mitali og 14 puntos, samtang si Orly  Navarro miamot og 10 puntos, lakip ang duha ka tres.

Ubos sa pagtimon ni coach Dodong Taborada, ang D’ Lurics Enterprises milabaw og 10 puntos sa kapin tres minutos ang nahabiling oras sa duwa, apan nahulga sila dihang misikit ang Iesieken, 60-59 sa nahabiling uno minuto.

May purohan unta ang Iesieken nga motabla o mokawat sa daog, apan wala  na makabalik pa sa ilang korte ang bola kay ang D’ Lurics Enterprises maoy nilangkat sa offensive rebounds sa  tulo  ka higayon.

Ang free throw ni Englis maoy mikandado sa kadaugan sa D’ Lurics Enterprises nga sama sa ilang biktima nagbitbit og 1-1 nga baraha.

Sa pasiunang duwa, ang Salt City, midaog pinaagi sa default batok sa JLP.

Ang Salt City nilang Reyden Villaronza ug Toycar Cardoza aduna na’y 2-0 ning maong  liga nga gikatakda matapos sa sayong bahin sa bulan sa Disyembre.

Sa laing bahin, ang Jamz Fresh Eggs gisugat og daog pinaagi sa pagpilde sa Allied, 71-61.

Si Jojo Bodo mikabkab og 15 puntos alang sa Jamz nga wala na molingi pa human milabaw, 47-38 sa sayong bahin sa third period. Si Roxan Razon miposa og 11 puntos ug si Edgar Nova mibatil og 10 puntos.

Ang napildeng Allied gipangulohan ni Gilbert Lesin sa iyang 13 puntos, gisundan nilang Erwin Budiongan ug Mendoza nga adunay 12 puntos matag usa.

Ubos sa pagtugot ni LABA president Gilbert Lesin, ang  mga duwa gipadagan nilang league commissioners Cris ‘Crismart’ Martinito ug Jun Arceo sa abag ni Orly Navarro.

Puntos matag usa

Unang duwa:

JAMZ Fresh Eggs (71) – Bodo 15, Razon 11, Nova 10, Monterde 7, Abong 7, Dicdican 6, Martillan 3, Sayaboc 2.

ALLIED (61) – Lesin 13, Budiongan 12, Mendoza 12, Recto 8, Gogo 2, Ygoña 2.

Ikaduhang duwa:

D’ Lurics Enterprises (63) – Gonzaga 21, Bukiron 11, Cabahug 7, Amaga 7, Coloscos 5, Englis 4, Morales 2, Armamento 1.

IESIEKEN (59) – Mahusay 14, Suson 14, Navarro 10, Sicad 6, Tagalog 3, Lumen  3, Gocotano 3, Yares 2, De Famo 2, Yatan 2, Cuerbo 2. (BANAT NEWS)