Paraiso mo, paraiso ko
Kadaghan ko na itug-an kanimo ang akong awit,
Ug midahili ang imong luha
Kaanindot tan-awon sa naggilakgilak nga tubig diha sa imong kaapingan.
Unsa man kini, luha ba sa kalipay o luha sa panamilit?
Gitagoan ko ang maong awit, pinangga,
Aron kon imo akong talikdan ako kining awiton
Sama sa pag-awit mo niadtong kahaponon
Dungan sa pagka lugtab sa kadena sa atong gugma
Oo, imo akong gitalikdan ug giilisan og laing awit
Kay matud mo bati na ang akong pagka siloy
Ug dili na nimo madungog ang katahom sa mensahe sa akong awit,
Kay ang imong kamabudhion mao nay mitabon sa wanang sa atong kagahapon
Nangita ko karon sa kanhi tang paraiso
Akong paraiso ug imo apan wala na
Bisan gani ang ilang mga tunob nahanaw na
dihang mingsakay sila sa midapyagdapyag mga balod sa imong pagluib...
Mel Gabriel - Carcar City, Cebu
#HUGOT
Nahigugma ka na ba? Nagpuyo ka ba sulod sa usa ka matam-is nga relasyon? Napukan ba ang imong paghigugma? Giluiban ka? Gibiyaan? Nagmaoy ka ba? Mibalik ba ang binuhat nga nagpapitik sa imong kasingkasing? Puno ka ba sa inspirasyon? Gikilig? Bisan unsa pa man ang imong gibati karon, angayan nimo ka na nga ipabuhagay pinaagi sa pagbalak!
Ug sa dili madugay, ang inyong kinaham nga Banat News Kalandrakas, mumantala na nianang maong BALAK nga namugna gumikan sa kalipay ug kasakit nga nasinati human ka nahigugma, gihigugma ug buot mahigugma.
Ipadayag ang imong HUGOT sa gugma! Ipadala pinaagi sa pag-like sa atong Facebook Page nga: Banat News. Didto ninyo ipadala ang inyong mga HUGOT BALAK sa gugma. Mahimo sab nga pinaagi sa snail mail:
HUGOT BALAK
C/o Banat News V. Gullas St., cor. D. Jakosalem St. Barangay Santo Niño 6000, Cebu City, Philippines
- Latest