Mga saad

Gula 113

Wala makasabot sa iyang gibati si Erica nganong gibiyaan man siya ni Andy? Tuyo kaha niya nga biyaan siya nga mag-inusara sa pagsuhid niya sa maong dapit may nakita siyang usa ka hamtong nga lalaki nga nag-atiman sa mga tanom sa beach house dali niya kining giduol.

"Manong si Andy? Nakita mo ba?" Pangutana ni Erica kang Enting ang hardenero sa pamilya ug maoy piyado sa ilang beach house.

"Ambot kun asa to siya day misakay man to sa iyang awto wala na lang ko mangutana kun asa siya kay mura'g nagdali," matud pa ni Enting.

"Hain man diay kaha to siya paingon?" milakra sa panagway sa dalaga ang kabalaka.

"Pastilan gyud ni si Sir oy mamiya man og buhi wala diay ka pahibaw-a?" ni Enting pa ug mipadayon  sa pag-ingon, "iya kang hinigugma inday? Mura man nig nag-ilis og senina si Sir," matud pa ni Enting nga mingisi.

"Ha?" Pagkahibulong sa dalaga,"murag nag ilis lang og senina bisag kinsay uyab," matud pa ni Enting"pila na ba diay ka babaye ang gidala ni Andy dinhi nong?" pangutana ni Erica.

"Ikaw pa hinoon pero sa akong nasayran man gud ug sa akong makita niya kay usahay moadto man ko sa mansiyon, lain-laing babaye may dad-on anang Sir didto sa ila. Pulos wa higustohi sa iyang inahan. Labihan ka estrikta ang inahan ni Sir oy. Wala pa diay ka niya dad-a sa ila?" ni Enting pa, "wala pa nong," tubag sa dalaga.

"Mata pobre kaayo ang inahan ni Sir ambot lang og magustohan ka ba sa iyang inahan kana si Sir para niya ang mga babaye igo lang duwaduwaan. Wala pa nay giseryusong babaye  inday," matud pa ni Enting" mao ba nong?" ni Erica nga nanghupaw.

Sa hunahuna sa babaye usa kaha siya sa babaye nga igo lang giduwa-duwaan ni Andy? kasakit kaha kun sama sa uban mao sab kana ang buhaton kang Andy kaniya. Nahigugma na siya ni Andy pero di sab siguro niya ipamugos ang kaugalingon kun igo lang siyang giduwaan niini. Abi ba kay nakuha na ni Andy ang iyang pagkababaye yano na lang kining mibiya kaniya sa beach house. Miduko si Erica nakadesisyon nga mag-ilis ug mopauli na lang apan sa kalit lang may sakyanan nga miabot. Si Andy ingon og nahuwasan ang dalaga. Paggawas ni Andy sa awto may dala kining duha ka dagkong plastic. Miduol kaniya nga mapahiyomon ug mihalok unya gitawag sa ulitawo ang ilang hardenero.

Namalihug nga lutuon ang dala niining preskong isda, lambay ug nukos. Pagtalikod sa ilang hardenero miagbay si Andy kaniya ug miagda nga manulod sila sa beach house.

"Kadaghan ba nimo'g gipamalit?" ni Erica pa.

"Mangaon ta'g daghan ron kinahanglan kang mukaon ha," sa lalaki pa.

"Dili man nato mahurot," matud pa ni Erica.

"Aw, kun dili mahurot ihatag kang noy Enting may dose na kabuok anak si noy Enting malipay ang pamilya niya kun hatdan niya'g pagkaon," matud pa ni Andy. Pag-abot nila sa veranda sa beach house, milingkod si Erica layo kaayo ang panan-aw nanghupaw nakabantay niini si Andy.

"Ngano? Kalawom ba sa imong panghupaw ayaw'g kabalaka human ta'g kaon maligo unya ibalik tika sa inyo," matud pa ni Andy.

"Igo ba lang ko nimong giduwa-duwaan sama sa imong gibuhat sa mga babaye nga nangagi sa imong kamot?" matud pa ni Erica nga seryuso ang tono. Mipahiyom si Andy ug gipabarog si Erica gipaliso ang lawas sa babaye paatubang ngadto sa dagat samtang  gigakos siya ni Andy gitapion ang iyang baba sa dawnggan sa babaye.

"Dili ka pwedeng duwa-duwaan? Angkunon nako nga daghan nang babaye ang nangagi nako pero ikaw Erica, espesyal dili mahimong pasakitan kay magdugang lang kini sa kabug-at sa imong gibati. Usbon ko sa pagsaad nga dili ug dili tika pasakitan ikaw ang gusto kong ikauban hangtod sa akong pagkatiguwang. Kita ang mag-uban, uban unya sa atong mga anak," matud pa ni Andy nga puno sa pagbati. (Sumpayan)