Sa kiliran sa akong pinangga

Gula 112

Igo lang nanghupaw si Erica ug mipiyong mihigda sa kama mitalikod kang Andy.

"Erica ngano? Dili ka ba diay gusto nga kahatagan og hustisya ang imong gidangatan uban sa kamot sa salbahis mong uyoan?" ni Andy pa nga mihikap sa bukton sa dalaga way tubag nga nabati si Andy. Mihigda si Andy ug migakos diha sa luyo ni Erica may nabati ang ulitawo nga hinay nga paghingos si Erica mihilak. Nakabantay si Andy ug hinay nga gipaliso ang dalaga, "dili maayo nga luha ang itubag mo sa gusto kong mahitabo tungod sa imong gidangatan Erica. Nahimo na kong kabahin karon sa imong kinabuhi dili ba giingnan ta man ka naa ko sa imong kiliran aron manalipod nimo? Angay lang nga magbayad ang imong uyoan," matud pa ni Andy.

"Apan wala ko niya madayon sa paglugos Andy," matud pa ni Erica.

"Bisan pa'g walay nahitabo ninyo apan sa iyang gibuhat nimo may kaso gihapon nga mapasaka batok sa salbahis mong uyoan Erica. Child abuse, sexual harassment tabangan tika may mga higala ko nga abogado nga suod sab sa among pamilya," matud pa ni Andy.

"Way nasayod sa nahitabo ikaw lang, si Melche ug si tiyo Edgar lang ang nasayud," matud pa ni Erica.

"Maulaw ka nga masayod ang kadaghanan?" ni Andy pa.

"Dili na ko gusto'g gubot pa gubot nang daan ang akong kinabuhi pun-an ko pa ba kini pinaagi sa pagpasaka'g kaso batok sa akong uyoan? Kapoy nako Andy," matud pa ni Erica nga namahid sa iyang mga luha.

"Kalimtan mo na lang ang nahitabo?" matud pa ni Andy.

"Oo Andy  pakasamahong ngil-ad nga urom sa akong kagahapon please ayaw ko'g pugsa nga pasakaan og kaso ang akong uyoan. Sa ako nang gikaingon gikapoy na kaayo ko," matud pa ni Erica, igo na lang sa pagpanghupaw si Andy.

"Sige ikaw ang mag-igo pero kun mausab ang imong huna-huna ayaw pagmakuli sa pagsangpit nako aron tabangan ka kay dili sab ko magmakuli sa pagtabang nimo, ha ba, Erica?" ni Andy pa nga migakos kang Erica, mitando si Erica.

"Matulog na ta ayaw ko'g biyai dinhi ka lang sa akong tupad," matud pa ni Erica.

"Okay  dili tika biyaan nia ra ko sa imong tupad sige na katulog na," matud pa ni Andy. Hinay nga gipiyong ni Erica ang iyang mga mata aron makapahulay. Dali kining nahinanok samtang si Andy way puas ang pagsud-ong niya sa dalaga tam-is ang pahiyom sa ulitawo. Gipahimutang ang pipila ka lugas buhok ngadto sa iyang dapit nga mitabon sa nawong sa babaye. Mainampingong gihapuhap ang nawong niini bisan asa na lang punta ang kamot ni Andy nga mainampingong mihapuhap sa babaye. Sa huna-huna sa ulitawo nga si Erica ang gihatag sa Ginoo kaniya kalooy gugmang tinuoray ug pagsalig ang gibati sa lalaki samtang way puas ang pagtutok sa dalaga.

Mitarong sa paghigda ang lalaki gibati nga kumpleto ang iyang gabii kay sa kataposan anaa na sa iyang kiliran ang babaye nga gihigugma niya sa hilabihan. Giisa niya ang ulo sa babaye aron pa-unlanon diha sa iyang bukton. Milihok ang babaye ug migakos kaniya mipahiyom og tam-is na usab ang lalaki gusto nga dili na lang unta matapos ang takna sa ilang panagdulog diin uban kaniya ang babaye nga gipakasama nga maoy nagkumpleto sa iyang kinabuhi taud-taud nakatulog na usab si Andy.

Udto na nga nakamata si Erica giliraw niya ang iyang mga mata sa palibot. Nakadayeg gyud siya sa maong dapit apan daling gitapion ni Erica ang iyang kilid may gipangita. Dihang wa diha ang gipangita dali niyang giisa ang katunga sa iyang lawas. Wa na sa iyang tapad ang lalaki dali kining mibangon aron pangitaon si Andy. Miadto kini sa veranda sa kuwarto misugat kaniya ang preskong hangin ug nakita niya ang maanindot nga talan-awon diin ang tubig sa dagat nag-iyahay nga ingon sa naglumbanaay nga makaabot diha sa lapyahan.  Apan dihang daling nahunahuna pagbalik si Andy, daling miadto sa grahe  apan pag-abot niya  wala ang sakyanan sa ulitawo. Hain na man diay kaha si Andy? Sa huna-huna pa sa dalaga gibiyaan kaha siya? (Sumpayan)