Nakapalimot sa kaalimoot

Alas 3 sa kaadlawon. Sa south bus terminal. Puno na sa mga pasahero ang Ceres bus nga gamay. Biyahe og Bato via Barili. Dili aircon ang maong bus. Alimuot na kaayo sa sulod. Gusto na sa mga pasahero nga molarga na.

Usa sa mga pasahero si Mario. Naglingkod siya kinadaplinan dapit sa tuo--sa ikalimang lingkuranan gikan sa frontseat. Usa siya ka seaman nga nibakasyon. Mopauli siya sa Malbog, Alegria. Dikit niya ang katupad nga lalaki sa iyang wala. Nagsugod na'g katumog sa singot iyang asul nga T-shirt dapit sa bukobuko.

Nisaka ang konduktor. May gikuyogang duha ka pasahero. Babaye ug lalaki. Mora'g magtiayon o manag-uyab. Kay batan-on pa'g mga hitsura. "Naa pay bakante duha sa luyo" sa konduktor, nitudlo dapit sa luyo. "Di ko ganahan sa luyo'' sa babaye. "Nganong di man ka ganahan?" sa lalaki. Naisang kilay. Nibudlot ang simod sa babaye. Wa una nitabi.

"Unsang orasa ta kalarga, bay?" ni Mario ngadto sa konduktor. Nakasinggit. "Drayber ray agdon, sir" sa konduktor. "Di ba pasahero agdon? Kay puno na man ang bus" ni Mario. "Natulog pa tingale ang drayber" sa konduktor. Nadungog ang mga panghupaw sa mga pasahero. May nipatuyok sa ilang kalimutaw.

Nisaka ang drayber. Nipuwesto sa iyang lingkuranan. Nipaandar sa sakyanan. "Arang-arang" sa hunahuna ni Mario. Nahimuot. "Huwaton sa nato akong kauban. Nangihi pa?" tingog sa babaye dapit sa luyo. "Wa kaha to malibang?" tingog sa lalaki. Nanghugyaw og katawa ang mga pasahero. Nalimtan ang kaalimuot.

"Nganong di lagi ka gusto sa luyo?" sublig sukot sa lalaki ngadto's babaye. Nagbarog ra sila duol sa pultahan sa bus. "Mosugot lang ko'g magbarog. Basta anhi lang sa atubangan dapit sa babaye. Seryoso ang hitsura. "Ngano man diay ang luyo?" sa lalaki. Kay daw gusto gyud makigtupad tingale'g lingkod sa babaye. "Mahadlok kog ma-late. Kay ulahi moabot ang luyo" sa babaye.

Nanghugyaw na sa'g katawa ang mga pasahero. Nakatawa'g apil si Mario. Apan wa niya masuta kun komedyante ba ang babaye o ignorante. Pero nakapalimot siya sa kaalimoot sa daghang pasahero. (Kataposan)