Salamat sa gugma mo - Gula 108

Gusto kong mupahulay. Gusto ko nga wa koy laing makitang tawo gawas kanimo, Andy," ni Erica pa. Natulala si Andy sa kataposang gisulti sa babaye. Way laing gustong makita si Erica gawas lamang kang Andy?  Sa hunahuna sa lalaki, nakapangutana, unsa man kahay buot ipasabot sa gisulti ni Erica? May pagbati na ba kini kaniya?"Erica. kuan..ahmm," pagkanga-kanga ni Andy wa masayud unsay isulti. Ingon og gikulbaan sagol ang kahinam ug kalipay.

Sa tanang tawo, nga siya ra man ang gustong makita sa dalaga sa panahon sa kagul-anan karon ni Erica? May buot gyud kahang ipasabot niini? Mipiyong una sa makadiyot ang ulitawo dayon namulong, "sige, pila na sab ka adlaw nga wala kay tarung tulog. Dili ta manulod og hotel. Adto ta sa among beach house. Maayo didto kay mingaw. Nindot ang ambience. Makapa-relax. Okay ka ba didto?" matud pa ni Andy."May klase ka ugma, dili ba?" pangutana ni Erica."Wa nay tarong ang klase karon kay nahuman na ang among finals," matud pa ni Andy. Pipila ka minuto nga kahilom, milingi si Andy sa nahimutangan sa babaye. Nakita sa lalaki nga nagpiyong ang mata ni Erica. Gipasagdan lang una niya kini aron sa gamay’ng panahon makapahulay siya ug makatagpilaw. Unya, naabot sila sa beach resort nilang Andy. Mitan-aw ang ulitawo sa babaye, gitutokan niya kini'g maayo. Hinay nga namulong ang lalaki sa pagtuo nga  nakatulog ang babaye, "I love you Erica. Sukad, karon pa gyud ko maka-feel niini. Ambot.

Dili ko sab masabtan ang akong kaugalingon kun nganong ingon na man lang niini ang akong gibati diha nimo. Special ka sa akong kinabuhi, Erica. Angkonon ko nga naluoy ko sa imong kahimtang. Sa inyong kahimtang diin ikaw lang ang naningkamot aron mabuhi mo sila, pero unsa man ning ilang gibawos nimo? Nganong lisud man para nila ang musabot sa imong side? Apan ayaw'g kabalaka, nia ko kanunay nimo. Ako ang musabot nimo. Hinaut nga dili mo lainon  sa pagsabot kun nganong mibati ko'g gugma nimo. Makadaghan ko na nga gipangutana ang akong kaugalingon kun tinuod ba gyud ning gugma, ning ulahi, nasuta ko nga tinuod ning akong gibati nimo. Tinuod nga gugma, Erica. Dili ko magtan-aw sa imong kaagi. Dili ko igsapayan. Dili kana importante para nako nga nahigugma'g maayo nimo. I love you so much, Erica. Kun may mahimo pa lang ko aron makuha ang kabug-at nga imong gipas-an. Kun mahimo pa lang nga ibalhin sa Ginoo diri nako ang tanang kagul-anan nga imong gibati karon, dili ko igsapayan lamang kahatagan ka'g kagaan sa imong gibati. Ingon tika niana ka mahal Erica." Sa lalaki pa. Apan sa kalit lang, mibuka ang mga mata ni Erica. Nakuratan ang lalaki.

"Salamat sa gugma mo, Andy. Salamat sa imong pagsabot." Ni Erica pa nga may luha nga inanay nga midagayday sa iyang aping."Erica. wa,.wala ka diay...wala ka diay matulog?" si Andy nga nagkabuang."Gusto kong matulog kay kapoy ang akong lawas. Nagpiyong ang akong mga mata pero bisan asa punta ang akong huna-huna, nabati ko ang tanan mong gisulti Andy," matud pa ni Erica

"Ha?" bugtong pulong sa lalaki. Medyo naulaw. Apan dihang nag-iyahay na pag-agas ang mga luha ni Erica, gipahiran sa lalaki pinaagi sa iyang mga tudlo ang mga luha sa iyang aping ug migakos sa babaye, "Shhh..ayaw na paghilak please? Matag kakita ko nimo nga maghilak, masakitan sab ko." Mga pulong sa lalaki nga nagpatandog sa balatian sa babaye.

"Tinuod gyud diay kang nahigugma nako, Andy. Dili mo lantawon ang mga bati kong kagahapon. Gugma gyud ang nagtukmod nimo aron magpaduol ka diri nako. Wala ko magtuo nga sa akong pagkatawo, may lalaking tinuod nga mahigugma nako. Salamat sa imong pag-unong nako. Kanunay kang naa sa akong kiliran ilabi na niining pinakaubos nga bahin sa akong kinabuhi nga nahanaw nako ang labing importanteng tawo sa akong kinabuhi. Pagkabuotan mo, Andy.Usbon ko, salamat kaayo sa imong gugma nako." Matud pa ni Erica nga mibawos sa paggakos kang Andy.

"Andam ko sa pagpaabot kun kanus-a ka   tugkan og paghigugma nako sama sa akong paghigugma nimo Erica," mainitong pulong ni Andy. "Sa imong gipakita nako Andy dili ko na pwedeng limdan ang akong kaugalingon. Kun unsay imong gibati nako mao usab kana ang akong gibati para nimo. I love you too,  Andy." matud pa ni Erica. (Sumpayan)