Sakit ni mama - Gula 80

Wala makatingog ang bayot sa taas nga pulong ni Erica nga mihilak na'g maayo midugang pa sa pag-ingon ang dalaga, "Kun nasayod ka pa lang bayot kun nasayod ka pa lang kini mao ang dakong hinungdan nganong nia ko sa dapit nga lapokon, nga bisan paghugasa'g asido ang lawas dili mawala ang mitapot nang hugaw sa kalawasan ug dili makapawala sa kalang-og nga mipilit," matud pa ni Erica nga midanguyngoy na.

"Sorry na day," si Melche nga mihingos na namahid sa iyang mga luha si Erica pinaagi sa iyang duha ka kamot. Milakaw kini og hinay palayo sa higala nangalot sa iyang ulo si Melche, nakaingon sa kaugalingon.

"Kabuang sad nako oy ngano ba sang nakasulti man sab ko adto oy? Da oy napasakitan nako ang akong amiga. Ingon pa ko sa uban nga wala koy gitugtan nga mopasakit ni Inday pero ako mismo mipasakit niya na-guilty na hinuon ko dah," matud pa sa bayot sa iyang kaugalingon. Daling gitan-aw si Erica nga nagkalayo niya nanghupaw og lawom kaayo nagduha-duha kun iya bang apason ang babaye.  Nagtuo ang bayot nga nahiubos niya si Erica, pero nakahukom nga bahala'g sagpaon siya ni Erica iya na lang gyud kining apason ug kuyogan. Kun sagpaon siya okay lang kay sala man sab niya wala makapugong sa iyang baba.

"Hay nako  tactless man gud ko oy  dili makapugong  hayyyy bayot jud diay ko kay mosirit ang baba. Pero ibutang sad unta nako sa lugar oy  piskot baya." Sa bayot pa nga nagyawyaw nga siya ra samtang sagol dagan ang paglakaw sa pag-agpas kang Erica.

Dihang duol na siya sa dalaga"day oy  kadiyot lang day." Sa bayot pa mihunong si Erica "day please sorry na oy, bayot man gud ko. Nya baba'g bayot di kapugong  mapasaylo pa ko nimo day? Pastilan gyud ning baba-a oy, um,.um..um.." si Melche nga gipilpil ang kaugalingong baba.

"Melchor" hinay nga kalmang pulong ni Erica "sakit unta ang pagtawag mo'g Melchor nako day pero okay lang, nakasala baya ko nimo" sa bayot pa mitan-aw nga pinaluoy-luoy ngadtong Erica, "Day nahiubos ka nako day? Sorry na ha.

Sagpaa ko day be aron makabayad ko sa akong sala nimo walag-tuo day okay ra magtiayong sagpa basta makabawos lang ka nako nahibawo ko nga nahiubos ka nako."

"Okay ra bayot oy sakto man sad ka siguro ngano tuod og mag-inarte ko,  ngano tuod nga maghinipokrita ko okay ra bayot dali na para na ta'g taxi duka na ko kayo," ni Erica pa.

"Sure ka? wala ka masuko nako? Wala ka mahiubos nako?" pagsiguro sa bayot. "Wala lagi, unsa ka ba?" ni Erica pa nga mipahiyom na.

"Ayy salamat mi-smile na ang akong miga pero aron pagmatuod nga okay ra ka nia oh dawata ri. Ayaw'g huna-hunaa nga bayad na ni Andy nimo. Huna-hunaa lang nga tip na gikan sa laing customer dawata ni day. Nagkinahanglan intawon ka ini. Hinumdumi ang imong mama masakiton  dad-on pa nimo'g doctor. Nakasiguro ko nga may tambal gyud nga iresita sa doctor  ohh dia oh," ni Melche nga midunol sa kuwarta mitutok una si Erica sa kuwarta nanghupaw dayon gidawat.

"Ayy salamat okay ra gyud diay akong jumiga nako tana day, manakay na tag taxi.

Tuod man gidugang ni Erica ang maong kuwarta nga gihatag ni Andy kaniya sa iyang tinigom dako-dako na gyud kini busa gidala niya ang iyang mama sa doctor. Nasayran nga grabe na ang sakit sa inahan ni Erica, aron sa pagsiguro, giundergo og series of laboratory tests didto nasayran nga cancer sa baga ang sakit sa iyang mama.

"Cancer sa baga doctor?" matud pa ni Erica ngadto sa doctor nga nagluha-luha ang mga mata. "Oo miss wala ka ba makabantay nga midako usab ang iyang tiyan?" sa doctor pa. "Unsa may buot ipasabot ana doctor? Naa bay laing sakit ang akong inahan? Mamaayo pa ba siya sa iyang cancer doc? Unsa may angay nakong buhaton doctor? Dili ko gusto nga mawala nako si mama," laing pangutana ni Erica ug mitibi na. (Sumpayan)