Rason sa pagkalapok

Gula 79

"Hala ha grasya ni bayot dili disgrasya ngaub-ngaub ha pa id-id waki? Idosh mag inugob, bayotaaa!..." ni Melche pa nga nanghinawak gidudo paghinay ang tudlo sa bayot ngadto sa tampihak ni Erica.

"Sige una na lang ko ninyo mobalik ko sa club mata'g karon ug unya bye Melch," ni Andy pa.

"Bye baby I love you but I love these ubes the most oohhh waging-wagi akong juninglis," sa bayot pa.

"Bye Erica," pagpanamilit ni Andy ngadto kang Erica wala motan-aw si Erica kang Andy apan gisiko siya ni Melche ug mihung-hong. "Nanamilit nimo si Andy oh,, customer na bayot show some respect will you? Ohh another waging-wagi nga maninglis"

"Okay, bye, salamat," ni Erica pa ngadto kang Andy dayon mipadagan palayo sa iyang awto ang ulitawo dihang nakabiya na si Andy.

"Mitimbaya tuod ka pero maura'g inalmerolan nga pwerting buwara sa init  kaging ug uga kayo  attitude ra ka bayot," ni Melche pa dayon tunol sa kuwarta "oohh dada, tip daw na ni Andy, tomilyon siya paghatag nimo'g tip sa dihang didto pa siya sa sulod. Mura'g dako-dako jud na kapin na sa libo sa akong tan-aw  di ko mangayo ana. Dawata kay nahibawo ko plano nimo ugma nga dad-on nimo sa doctor ang imong inahan. Ayaw kaayo ipataas ang imong garbo. Wa ma-uso sa sama nato nga nagtrabaho sa club ang garbo. Kun unsay ihatag sa customer dawaton modili pa ka ini? Ayaw pag hinipokrita day kay kitang naa sa club mao ni ang atong kinaham nga madawat. Dili kaayo ta magpakalimpiyo kay halos tanang tawo nga nahibawo kun unsa ta hugaw pa ta sa tanang hugaw. Maura ta'g nagdala'g virus nga makamatay sa ilang pagtuo. Busa  minos-minosi ang imong pagpaka-santos kay wa ka mag-alagad sa simbahan. Dili parokyano sa simbahan ang imong gialagaran kun dili parokyano nga uhaw sa kalibutanong kalipay. Uhaw nga makakita og babaye nga halos way gisul-ob sa iyang lawas gets mo?" litaniya sa bayot nga medyo seryoso.

"Wala ko magpakalimpiyo bayot ug bisan kanus-a dili mahitabong magpakalimpiyo ko sa unang pagtikang ko lang sa ang-ang sa hagdanan sa club  nahibalo nako unsang matanga sa kinabuhi ang mag-usab sa akong pagkatawo," matud pa ni Erica nga medyo gisakitan sa gipanulti sa bayot. Sa nahisgotan sa nangagi may pagka tactless gyud si Melche.

"Naa ra man diay na ako sad diay'ng ipahinumdom nimo ang imong kaagi uban sa salbahis mong uyoan," ni Melche "ipanawong mo na sab na nako?" matud pa ni Erica.

"Pagpahinumdom lang na day usa na sa hinungdan nga misugot kana gyud nga mag-dancer ka sa club kun wala ka pa lugosa sa imong uyoan  dili mausab ang imong hukom. Dili ba kaniadto hugot kaayo kang mibalibad sa akong tanyag nimo nga pasudlon tika'g dancer sa club? Pero kalit kining nausab dihang nalugosan ka sa imong tiyo," matud pa ni Melche.

"Nausab ang dagan sa akong kinabuhi tungod sa kawad-on, nausab ang dagan sa tuyok sa akong utok tungod kay halos malunosan na mi sa kagutom. Misulod ko ining matanga sa trabaho tungod kay dili ko makatugot nga mausab ang tuyok sa akong utok ug mabuang ko tungod sa kagutom. Mas maayo pa nga mausab ang tuyok sa akong utok ug mapunta ining matanga sa trabaho kay masudlan man ang among tiyan. Malikayan ang pagtuyok sa utok ngadto sa pagkabuang tungod kay way sulod permi ang tiyan. Kun nasayod ka pa lang kun unsa kasakit sa dughan nga makita ang mga igsuon nga mura'g mga iro nga kun may bukog nga iitsa diha sa sawog kuninitan ug ilogan. Kun nakasuway ka pa lang unta nga halos magdugo ang imong kasing-kasing sa higayon nga panggutmon na ang imong mga igsoon nga wala ka masayod kun unsaon nimo sila aron matambalan ang ilang kagutom. Kun nakasulay ka pa lang unta nga may inahan ka nga halos mamatay tungod sa pagsige'g inubo mura'g naghigos tungod sa sakit nga wala ka masayod kun unsay sakit kay walay bisan usa ka dako nga makuot sa bulsa aron ipa-doctor ang imong inahan," matud pa ni Erica nga nag-iyahay na pagtulo ang mga luha. (Sumpayan)