Dunot nga kagahapon - Gula 73

Wala dayon makatingog si Ferdie sa iyang nabati sa gipamulong sa asawa.

"Kun mobiay-biay ka maura'g unsa na gyud ka kalimpiyo," matud pa ni Mylene. "Angay siya sa mga pagbiay-biay kay dili siya maayong panag-ingnan dili na maihap sa tudlo ang mga lalaking mipatong nianang babayhana commercial sex worker! Puta siya naingon usab og langaw nga gustong mupatong sa buko-buko sa kabaw," matud pa ni Ferdie.

"Bitaw ug may tawo sad kang gustong mupatong sa bukobuko sa kabaw wala mo ba lantawa nga ang imong kaagi susama sa kang Kyle? Ayaw palabi sa imong sinultihan ug pagbiay-biay kang Pia kay may kagahapon ka sab nga dunot kun buot hunahunaon," matud pa ni Mylene.

"Ayaw na kadto’g hisgoti kay milabay na kadto angay na tong ibutang sa kalimot," ni Ferdie pa.

"Dili Ferdinand dili mahimong ibutang sa kalimot ug kinahanglang pahinumduman ka aron lamyon mo ang kaugalingon mong mga pulong sa pagbiay-biay sa susama'g kalidad ni Pia," matud pa ni Mylene mitutok kaniya si Ferdie nga medyo naghangos. Midugang sa pag-ingon si Mylene, "usbon ko  nalimot kana ba diay niadtong dekada nuybenta? Nalimot ka ba sa pangalan nga Erica, nga halos na lang magtulo usab ang imong laway samtang magtan-aw kang Erica nga halos hubo ang lawas nga misayaw sa entablado? Nalimot kana ba diay niya ha Ferdinand? Ako wala pa ug lab-as pa sa akong panumdoman ang tanan!"

"Ayaw na kadto’g hisgoti pa ayaw itandi ang kagahapon ug karon kay may dako kini'g kalainan lahi si Erica ug lahi usab si Pia," matud pa ni Ferdie.

"Managsama kay managsama silang nabuhi diha sa gitawag ninyong lapokon nga dapit managsama nga nagtrabaho sa club diin lawas ang nahimong puhonan aron masudlan niya ang mga nagkutoy nga mga tiyan. Dili makaako nga malunosan sa kagutom ang pamilya maong milunang sa lang-og nga lapok tungod ug alang sa mahal niya nga pamilya!" ni Mylene pa nga wala na makapugong sa iyang kaugalingon mitulo na ang luha niini.

"Nganong hangtod karon naghunahuna ka man anang ginganlan og Erica? Ayaw na kana'g hisgoti labi na ngadto sa akong mga ginikanan," matud pa ni Ferdie.

"Ngano? Mahadlok ka? Mahadlok ka nga sama ka ni Kyle nga mipunit usab og burikat ug mahibaw-an ngadto sa tibuok mong kaliwat nga mipatol ka'g babaye nga naa sa kalapokan mabuhi?" matud pa ni Mylene.

"Mylene, igo na husto na, ayaw na pagsige'g hisgot sa nangagi," matud pa ni Ferdie nga inanay nang mikalma. Dili Ferdinand kinahanglang balikon aron makaamgo ka sa imong pagkamapalabi-labihon. Sa imong pagkamabiay-biayon sa susama kang Pia, kinahanglang pahinumduman ka sa dunot mo nga kagahapon uban kang Erica.

Kinahanglang pahinumduman ka sa kinabuhi ni Erica, nalimot ka nga usa ka gabii niana gikahibala'g mo si Erica? Nahigugma ka sab sa babaye nga naa sa club magtrabaho. Giabibahan matag kiay ni Erica diha sa entablado makabungog nga pak-pak ang molanog sa tibuok dapit kun mosayaw na si Erica," matud pa ni Mylene nga nanumbalik sa panumduman ang kaagi ni Erica diin nalambigit kini ni Ferdie.

Clap! Clap! Clap!! Mga pak-pak nga milanog sa tibuok dapit human matapos ang sonata nga gisayaw ni Erica. May nanagsinggit pa nga "more!! more please, Erica!" Mga singgit sa kalakin-an nga mura’g mabuang sa kaanyag ni Erica.

Apan wala kini panumbalinga ni Erica dali kining mipaingon sa dressing room human mapalong ang tanang suga. Sa dressing room samtang nag-ilis si Erica aron manawat og customers nga makig-table niini misulod ang bayot nga si Melchora.

"Bravo!! Este,..brava diay," matud pa sa bayot nga mipakpak nga naa sa luyo ni Erica. "Bayot okay ra ba ang akong pagsayaw?" pangutana pa ni Erica pwerting okay-ha. Day oy..ikaw na gyud. Tang-an na gyud kaayo kang mosayaw naa pay pinapaak sa ngabil nga mopasamot sa kahinam sa mga ikals day. Ug hoy pagdali diha kay naay nagpaabot nimong customer guwapo ug batan-on day!" pagpahibawo pa ni Melchora sa dalaga. (Sumpayan)