Desperado

Gula  21

"Ferdie unsa ka ba? Nagkinahanglan nato ang atong anak kuyogi ko," matud pa ni Mylene.

"Dili na ko mag-usik sa akong panahon niya nahibawo ko nga tungod na sab na sa iyang pagpakabuang sa babayeng..."wala tiwasa ni Ferdie ang buot isulti nangagho na lang kini.

"Sige ako'y adto sa akong anak gamiton nako ang usa ka sakyanan," matud ni Mylene dayon daling nag-ilis aron maadto niya ang anak sa Cebu, City.

Daling naabot si Mylene sa apartment ni Kyle, mao gyu'y nakita sa inahan ang palibot nagkatag ug daghang buak nakita usab niya si Kyle nga naa sa salog nagkupot og botelya sa bino samtang nagsige'g tungab niini daling miduol si Mylene sa anak.

"Anak Kyle, Ginoo ko nagkadugo ka unsa bay nahitabo nimo?" matud pa ni Mylene nga daling mipaingon sa gibutangan sa first aid kit daling gihunaran ang samad sa anak ug gibutangan og bendahe. "Mga bwesit!" ni Kyle pa nga nahubog na sa pagsige'g tungab sa botelya sa bino.

"Anak ngano bang naingon ka man niini? Tan-awa ka ra dako-dako ang samad mo sa imong kamot," matud pa ni Mylene nga wala mawala ang kabalaka sa anak.

"Samad sa akong kamot ma? Wala ra ni katunga sa samad sa akong kasing-kasing nga gimugna ni Pia," matud pa ni Kyle nga naghilak. "Wa gyud masayop si daddy mo si Pia na sab ang hinungdan," ni Mylene pa giusa-usa pagtan-aw ni Mylene ang mga nagkatag nga mga butang ug mga nangabuak midugang sa pag-ingon pagkakatag dinhi daghang buak naunsa ka man? Mura man og matapos na ang imong kalibotan nga gibuwagan ka nianang Pia," matud pa ni Mylene.

"Ma, sakit kaayo ang iyang gibuhat  dili pa igo nga iya kong gipalay-an ug gibuwagan gipabati pa gyud ko niya sa iyang pagpakighilawas niadtong tiguwang nga lalaki nakita ko siya didto sa club nga may kuyog nga lalaki ma. Gisakay siya sa sakyanan niini pag-abot ko dinhi sa balay gitawgan pa ko niya aron lang pasuyaon? Dili lang kay suya ang akong gibati ma, gisakitan ko sa iyang gibuhat.

Nganong kinahanglan pa man nga iya kong pabation sa iyang pagpakighilawas niadtong tiguwang nga iyang gibaylo nako?" ni Kyle pa nga midangoy-ngoy nga migakos sa inahan.

"Anak ko," bugtong pulong ni Mylene. "Mas maayo pa sigurong mamatay na lang ko ma kay sa masakitan ko'g sama niini mahal ko kaayo si Pia," matud pa ni Kyle.

"Kana kay may lain na siya tingali wa nay rason nga magsige ka gihapon og gukod niya anak," matud pa ni Mylene.

Midangoy-ngoy og maayo ang lalaki midugang sa pag-ingon si Mylene, "pangita na lang og laing babaye anak," tambag pa ni Mylene milingo-lingo si Kyle.

"Dili ma, si Pia ang gusto ko, si Pia ang gusto ko nakasabot ka ba ma? Si Pia. Nahigugma ka sab dili ba ma? Dili ba? Nakasabot ka sa akong gibati dili ba ma? Mahal ko kaayo si Pia," matud pa ni Kyle nga mura'g bata nga mitibi dayong bakho og maayo.

"Nakasabot ko apan may lain na man kaha siya? Ayaw na lang pamugos sa tawong wa nay gusto nimo," matud pa ni Mylene.

"May tawo nga nagmaniubra ining tanan sila si Daddy ug Diane sila ang nakaingon ining tanan. Sangko sa langit lagbas sa yuta ang akong kalagot nila ma mga bwesit sila sa akong kinabuhi. Dili sila makahibawong mosabot sa akong gibati abi kay usa ka babayeng bayaran si Pia wala na lang gyud siya'y katungod nga mahigugma nako?

Unsa man gyud diay ka limpiyo ning atong kaliwat? Wala ba gud diay silay buling sa sala aron pakasamahon nila si Pia nga usa ka virus? Mananakod? Nahibawo ko kun unsa kadako sa gugma ni Pia diri nako nahibawo ko nga napugos siya sa pagpakigbuwag nako tungod nila.

Tungod sa mga tawong nagpaluyo ining tanan busa puslan man ma..." naputol ang buot isulti ni Kyle, daling nakakita sa buak nga bildo sa iyang tungod ug gipunit ug nagkanayon, "puslan man maayo pa'g mamatay na lang ko," daling tapion sa buak nga bildo sa iyang pulso.

"Kyle, ayawww!!" ni Mylene pa. (Sumpayan)