Uy Dodong!

Uy dodong nganong imo man ko gibiyaan

Gipili nimo ang babaye nga pinunitan ra nimo sa dalan

Usa ako ka babaye nga desinte

Pero gipili mo siya nga ang nawong mura’g iti

Nakit-an tamong duha nagkuyog sa plaza

Ka maayo man ninyong batoon duha

Kung makagunit siya nimo mura og plema

Kay pwerte man gyod niyang luora

Intawon dodong ako naglibog

Kun ngano siya pa man ang imong na tuhog

Tungod ba sa lamian niya nga paa?

Bahala na iyang nawong pwerting maota

Uy dodong buta ka ba?

Unsa may nakita nimo diha kaniya?

Kun nawong lang pagahisgotan

Nanay ko moingon nga anaa nako ang tanan

Busa ngano siya pa man gyod dodong?

Ngil-ad man tuod ko og batasan

Apan kun ako pa to imong gipili mapalipay gayod taka og taman

Ug ako pang mahatag nimo ang tanan-tanan

Kung demonyo man ko’s imong panan-aw,

Samtang siya anghel nga imong gilantaw

Apan kining demonyoha makahatag kanimo og igong kainit

Nga imong gipangita kun gani mongitngit

Bahala ka diha dodong, pag-uban na lang mong duha

Sa imong anghel makahatag nimo og langitnong kalipay

Apan sa katapusan sa empiyerno gihapon kita magkakitaay

#HUGOT

Nahigugma ka na ba? Nagpuyo ka ba sulod sa usa ka matam-is nga relasyon? Napukan ba ang imong paghigugma? Giluiban ka? Gibiyaan?  Nagmaoy ka ba? Mibalik ba ang binuhat nga nagpapitik sa imong kasingkasing? Puno ka ba sa inspirasyon? Gikilig? Bisan unsa pa man ang imong gibati karon, angayan nimo kana nga ipabuhagay pinaagi sa pagbalak!

Ug sa dili madugay, ang inyong kinaham nga Banat News Kalandrakas, mumantala na nianang maong BALAK nga namugna gumikan sa kalipay ug kasakit nga nasinati human ka nahigugma, gihigugma ug buot mahigugma.

Ipadayag ang imong HUGOT sa gugma! Ipadala   pinaagi sa pag-like sa atong Facebook Page nga: Banat News. Didto ninyo ipadala ang inyong mga HUGOT BALAK sa gugma. Mahimo sab nga pinaagi sa snail mail:

HUGOT BALAK

C/o Banat News  V. Gullas St., cor. D. Jakosalem St.  Barangay Santo Niño 6000,  Cebu City,  Philippines