Sa empiyerno - Gula 19

Motikang na unta paingon nila ni Pia si Kyle, apan dali kaayong mipaingon kaniya ang bouncer nga pwerting dakoa og lawas.

"Nia na sab ka aron magsamok-samok kang Pia?" sa bouncer pa.

"Wa moy labot hinigugma ko si Pia," matud pa ni Kyle.

"Gihigugma sa imong mata gibuwagan kana ni Pia dili na mo managtrato busa palay-i na si Pia," matud pa sa bouncer, milingi ang bouncer sa nahimutangan ni Pia ug sa hamtong nga lalaki nga mipaingon usab sa parking area diin gialalayan sa hamtong nga lalaki si Pia pagpasulod sa kotse niini. Human makapahimutang si Pia misakay usab ang maong lalaki midugang sa pag-ingon ang bouncer, "kita ka adtong kuyog ni Pia? Mao toy bag-o niyang uyab kun dato ka dato sab tong tawhana negosyante to.

“Hinatagan si Pia sa tanan niining gusto," matud pa sa bouncer human masiguro sa bouncer nga nakapalayo na ang gisakyan ni Pia uban sa hamtong nga lalaki mibalik kini sa iyang pwesto. Wala makasabot si Kyle sa iyang gibati gisakitan siya sa iyang nakita ilabi nang gisakitan siya sa iyang nahibaw-an nga uyab ni Pia ang usa ka hamtong nga lalaki diin matud pa sa bouncer usa ka adunahang negosyante.

Wala kapugngi mitulo ang luha sa lalaki grabeng kasakit sa dughan ang iyang gibati gusto siyang mosyagit apan ingon og moungot ang iyang dila. Ingon og dili mabuka ang baba naghangos nga mura’g kawad-an na sa iyang gininhawa ang lalaki.

Apan gipakigbatokan kini ni Kyle, nakahimo pa sa pag-control sa kaugalingon daling mipara og taxi. Misakay. "Asa ta sir?" pangutana pa sa taxi driver," sa empiyerno!" matud pa ni Kyle agi'g tubag sa pangutana sa driver.

"Kun gusto kang moadto'g empiyerno Sir pagsolo pangita didto'g laing taxi nga mohatod nimo sa empiyerno," matud pa sa driver. Mitan-aw sa rear mirror si Kyle diin nagkasugat ang panan-aw nila sa driver medyo mikalma si Kyle.

"Padagana na lang ang imong taxi bahala ka'g imo kong ituyok-tuyok sa siyudad. Ingnon na lang tika'g asa ta paingon ayaw'g kabalaka may ikabayad ko," matud pa ni Kyle nga mipiyong na lang.

Gusto nang mohilak tungod sa iyang nasaksihan dili pa lang gyud dugay nangagho na lang ang driver ug gipadagan ang taxi.

Hapit mo-usa ka oras nga nagtuyok-tuyok sila sa siyudad samtang si Kyle, gustong mohilak gustong magwala apan dili siya makabuhat hangtod nga wala makaantos ang driver.

"Asa man gyud ka Sir? Unsa man, ngita ka'g babaye nga kalingawan?"pangutana sa driver kang Kyle nga mitan-aw sa rear mirror sa taxi. Mitan-aw usab niya si Kyle midugang sa pag-ingon ang driver, "ingon pa lang kang daan nako, gidala na tika sa dapit diin tua didto magtapok ang mga sexy kaayong mga babaye. Barato ra Sir dili parehas didto sa akong gipik-apan nimo. Mahalon kaayong mga babaye didto," matud pa sa driver.

"Sa Happy Valley ta," matud pa ni Kyle.

"Asa dapit sa Happy Valley? Naa may motel diha naay naghuwat nimo didtong babaye Sir?" matud pa sa driver nga mingisi.

"Taga Happy Valley ko mopauli na ko," matud pa ni Kyle.

"Aw, unsa ba diay? Olrayt! Dugaya sad nimong nakahukom nga mopauli oy makapick-up pa unta ko'g lain pang pasahero," matud pa sa driver nga nanagu'to'.

"Triplihon nako ang patak sa imong meter," matud pa ni Kyle.

"Aw kana, nindot nang paminawon Sir sige Sir, larga ingna lang ko asa tika ihunong ha,” matud pa sa driver.

Walay kalinaw sa huna-huna nga naabot si Kyle sa apartment misinggit kini sa taman, dayong napaluhod ug mihilak, giaswat ang center table ug gibunal, apan sa kalit lang, mi-ring ang iyang cellphone way ngalan nga nakarehistro, number lang dali niya kining gitubag.

"Hello," ni Kyle pa.

"Ahhh shit..ohhh," agulo sa usa ka babaye ang nabati sa pikas linya. (Sumpayan)