Ang tawong himasa

Ning sayong kahaponon ang lima ka estudyante sa College of San Pablo nag-estambay duol sa bookstore sa usa ka mall amiga nila si Ruth nga cashier sa maong bargain bookstore.

 “Makakita lagi mo og tawong ma-interview. Huwat-huwat lang,” pasalig ni Ruth ngadto nilang Rapunzel, Stella, Suzette, Dory ug William lima sila sa ilang grupo sa subject nga Sociology. Gipahimo sila’g report sa instructor mahitungod sa lima ka tawo nga ilang pangutan-on og “What is Cebu to you?” Videohan nila sa selpon ang motubag sa pangutana ug obserbahan kun sinsero ba o dili ang tawo.

“Excuse me sir,” ni Rapunzel pagduol niya sa tawo. “Puwede ka namo ma-interview? Para sa project namo sa eskuylahan?” ni Rapunzel. “Unsa man nang prodyeka, day?” sa tawo. “Sa Sociology. Motubag lang ka sa pangutana, what is Cebu to you?’ ni Rapunzel. “Ah, mao ba?” sa tawo. “Puwede na sugdan namo sir?” ni Rapunzel.  Nanuol ang upat ka kauban niya puro naggunit og selcam. “Yuna pa ra gud bidyohan diay ko ninyo?” sa tawo. “Maoy sugo sa among professor sir pero puwede’g di ka lang motan-aw” ni Rapunzel. “Mao sab kay basi’g mahadlok sa akong nawong ang motan-aw” sa tawo nipahiyom.

“Kadiyot lang kinsa man diay ngalan ninyo maayo nang naa koy mapaninglan. Basi’g moguwa akong nawong sa facebook unya himuon lang kataw-anan” sa tawo. “Di tawon, sir oy mga tarong ming estudyante. Ako si Rapunzel” niya pa “ah Rapunzel? Kini imong mga kauban, sila si Snow White, Cinderella, Sleeping Beauty ug si Prince Charming?’ sa tawo nangomedya nahanaw ilang kahadlok.

“Cebu to me is the best place in the world I was born here, was educated and became a professional here. I have experienced joy and sorrow in Cebu. But despite that, I still love Cebu” sa tawo. Mura gyud hinuon siya’g nasuko tan-awon kun di magpahiyom. “Salamat kaayo, sir” ni Rapunzel. “Way sapayan” sa tawo. Nipadayon og pangukay sa mga libro. Nisinyas si Ruth nila’g “thumbs up”. Kay niya pa ang tawong himasa, posible loner, pero broad and open- minded. (Kataposan)