Pag-akon ni Diane - Gula 16

“Dili ba nga wala ka may supak pwes tabangi ko nga makig-uli nako si Pia ma dili ko mabuhi kun hingpit ko niyang palay-an mamatay ko kun mahanaw siya sa akong kinabuhi ma. Please, please ma, tabangi ko," ni Kyle pa nga mikupot sa duha ka kamot ni Mylene nagpakilooy sa inahan nanghupaw una si Mylene.

"Sige makigsulti ko nianang Pia, aron masayod sab ko sa hinungdan kun nganong gibuwagan ka niya tingali  dili itago ni Pia diri nako ang hinungdan. Sa amo unyang panagsulti magmatuod kini nga walay kalabotan ang imong amahan sa pagdesisyon ni Pia nga buwagan ka.

"Salamat ma daghang salamat sige hatagan tika sa iyang address taga Mandaue, City siya ma," ni Kyle pa gihatag ang insaktong address ni Pia.

Alas siyete sa buntag migawas na si Kyle gikan sa hospital may bendahe ang iyang agtang gihatod kini sa inahan sa gipuy-an niining apartment. Gitambagan ni Mylene nga dili pasakitan ang manghod nga gituhoan ni Kyle nga usa sa hinungdan sa panagbuwag nila ni Pia. Misaad usab ang lalaki apan miingon nga dili siya maka-promise nga tinggan niya ang manghod kay dili lalim para niya ang nahitabo nila ni Pia gumikan sa pagkatabian sa iyang manghud human mahatod ni Mylene si Kyle sa gipuy-an niini mipauli kini sa ila sa Lapu-Lapu City. Si Kyle usab hapon nang nakamata.

Giparing niya ang cellphone ni Pia apan dili na kini mo ring nagpasabot nga nag-ilis kini og number. Misamot ang kaguol ni Kyle gitawgan niya ang inahan nga tumanon ang gisaad niya nga pakigsultihan si Pia nakahukom usab ang lalaki nga adtuon niya si Pia sa gitrabahoan niini. Magpabaga siya sa nawong tungod ug alang sa dako niining gugma sa babaye. Gusto untang molakaw si Kyle mintras wala pa ang manghod tua pa sa eskwelahan apan wala diha ang iyang sakyanan, tua kini sa shop tungod kay maayo kaayong pagkaguba sa atubangang bahin niini. Mataud-tauran pa una mabalik niya ang iyang sakyanan busa nakahukom na lang ang lalaki nga magtanggong sa iyang kuwarto sa apartment unya na lang siya mogawas sa balay kun hapit na ang oras nga igawas ni Pia gikan sa club.

"Nia man lagi ka?" pagkahibulong ni Mylene nga nakita ang anak nga babaye nga mitumaw sa ganghaan sa harianon nilang panimalay," dili ko ganahang mopauli sa apartment nahibawo ko nga naa si kuya didto. Basin tinud-on tong iyang giingon nga wala pa kuno mi maghuman. Basin og dili lang tamparos ang akong mahiaguman sa salbahis kong maguwang. Basin mapatyan ko adto,   matud pa ni Diane nga milingkod sa humok nilang lingkuranan. Nanghupaw na lang si Mylene midugang sa pag-ingon si Diane, "yabag tawhana ngano gung ako may pasanginlan niya nga nadisgrasya siya? Ka amaw og utok. Ako ba guy nag-drive? Padala man sa tama sa gugma maong naingon siya adto ngano gud tawon nga mag-usik siya’g panahon para lang adtong klaseha sa babaye? Maayo ra nga gibuwagan siya oy maayo sad aron magmalinawon na ko sa apartment dili na ko makabati og agik-ik sa igat nga Pia, pulong sa babaye nga misulimbat ang mata.

"Sultihi ra gud ko sa tinuod Diane," matud pa ni Mylene “Unsa ba na ma?" si Diane.

"Nahuna-huna nako niadtong nagsultihanay mi si kuya mo Kyle, kalit lang misulod si daddy mo sa kwarto sa iyang sinultihan mura’g daan na siyang nasayod mahitungod sa pagpakigrelasyon ni kuya mo kang Pia," "well mosulti na lang ko sa tinuod. Dihang didto pa si Daddy sa iyang meeting nga paingon kong mopauli kay gisapot kong kuya kadto ra ang akong gitext niya. Pero dihang didto si daddy sa study room ug samtang ikaw nagkutaw pag kape para kang daddy gisulod ko siya didto ug gisultihan mahitungod anang Pia kay gusto ko nga masayod si Daddy aron iyang mabadlong si kuya nga dili niya dad-on sa among apartment ang iyang uyab nga prostitute.

Gitayming ko sab nga padulong kanang mosulod sa study room dali sab kong migawas gihangyo ko si daddy nga dili mo sultihan nga gisultihan ko siya," pag-angkon pa ni Diane

"Si lola mo imo sang gisultihan mahitungod sa pagpakigrelasyon ni kuya mo nianang Pia nga naa magtrabaho sa usa ka club?" laing pangutana ni Mylene. (Sumpayan)