Pabor

Gula 16

"Anak kinsa man kong mosupak sa kinsay gipitik sa kasing-kasing nimo? Apan Kyle ang pag-akusar mo sa imong amahan dili maayo. Wala kay igong basehanan, ang tanan pagduda lang. Labaw nang dakong sayop ang pagsukol mo sa imong daddy. Wala mo ba lantawa kun unsay gikadulot sa imong amahan sa imong kinabuhi? Wala ba nimo makita kun unsa ka mapinanggaon ang imong  amahan ninyo? Sa imong gibuhat ni daddy mo nasakitan ko. Pinangga ka ni papa mo gani hinatagan ka sa unsay gusto mo mahal ka kaayo ni daddy mo, kamong duha si Diane," matud pa ni Mylene nga mihapuhap sa buko-buko sa anak.

"Pinangga? Mahal? Kun tinuod ko niyang gimahal ug gipangga nganong dili man siya mosabot kun kinsay gipitik sa akong kasing-kasing? Nganong gusto man niyang palay-an ko si Pia?

Nag-agi usab siya nga nahigugma siya Kay kun wala pa wala mi ining kalibutana dili ba gud na matawag nga hakog siyang klaseha sa pagkatawo?" matud pa ni Kyle.

"Anak, nag-eskwela ka pa lang taas kaayo’g pangandoy nimo ang imong daddy kami si daddy mo gusto mi nga makatiwas ka sa pagtuon kay kamo si Diane ang bugtong manunod sa katigayonan nga gipundar sa imong amahan. Hinungdan nga naningkamot aron lang kahatagan mo'g maayong kaugmaon sabta si Daddy mo," matud pa ni Mylene.

"Sabton? Siya, misabot ba siya nako?" matud pa ni Kyle.

"Anak nakasabot ko nimo apan nakasabot sab ko ni daddy mo," matud pa ni Mylene.

"Isalikway ko niya? So be it. I don't care," ni Kyle pa.

"Unsay buot mong ipasabot?" pagpangunot sa agtang ni Mylene nga mitan-aw sa anak.

"Bahala’g gibuwagan ko ni Pia dili gihapon ko mo-surrender ipakita ko kang Pia nga tinuod kong nahigugma niya ipakita ko usab ni daddy nga makamao kong mobarog og ako," matud pa ni Kyle. "Moundang ka sa imong pagtuon?´pangutana ni Mylene sa anak.

"Oo ma mangita ko'g trabaho ug dili ko mohunong sa pagsige'g hagad ni Pia sa pagpakasal nako," desididong pulong ni Kyle, "Kyle," bugtong pulong ni Mylene.

"Ipakita ko niya nga wala magsilbi ang iyang pagkagamhanan nga mahimo niya ang bisan unsa nga gustong buhaton. Niining higayona ipakita ko kang daddy nga nasayop siya dili niya pwedeng buwagon ang duha ka kasing-kasing nga nagkahinigugmaay," matud pa ni Kyle.

"Nagtuo gyud diay ka nga si daddy mo maoy hinungdan nganong gibuwagan ka ni Pia?" matud pa ni Mylene. "Oo ma, kinsa pa may lain?" tubag sa ulitawo ngadto sa inahan.

"Anak siento porsiento nga walay kalabotan si daddy mo sa nadesisyonan sa imong hinigugma nahibawo ko niana.

Way bisan gamay’ng butang nga dili ko masayran sa mga plano ni daddy mo busa wagtanga sa imong huna-huna ang pagduda nga si daddy mo ang nagmaniubra aron buwagan ka ni Pia.

Usa pa, dili ko mutuo nga mibayad si daddy mo og dakong kantidad aron mo-decide si Pia nga palay-an ug buwagan ka. Siguro may rason siya nganong gibuwagan ka niya," pagpasabot ni Mylene. Miduko na lang si Kyle. Mihilom sa makadiyot dayon hinay nga mitan-aw ngadto sa inahan mitan-aw si Mylene sa anak naghuwat kun unsay gustong isulti niini.

"Ma dili ba matud mo dili ka supak sa among relasyon ni Pia? I mean,wa kay pagsupak kang Pia nga akong hinigugma, tingali  wala ka say supak nga magpakasal mi?" matud pa ni Kyle.

"Anak kun kasing-kasing sa akong mga anak nay hisgotan dili ko manghilabot apan pagtambag lang ang bugtong kong mabuhat nga unta kun may gihigugma man ang akong mga anak, dili nila pasagdan ang ilang pagtuon," matud pa ni Mylene

"Ma, pwede mangayo og favor nimo?" ni Kyle pa ngadto sa inahan.

"Unsa kana?" ni Mylene.

"Pakigsultihi si Pia nga dili ko niya buwagan. Hangyoa siya nga mosugot na siyang magpakasal na mi," matud pa ni Kyle nga nakapakugang sa inahan.

Motuman kaha si Mylene sa hangyo sa anak?  (Sumpayan)