Komosyon sa hospital

“Ferdie, dili sab siguro maayo nga tunglohon mo ang imong anak,” matud pa ni Mylene.

“Sukad ka lang nakiglambigit nianang ginganlan og Pia, nagkawala kanay batasan Kyle. Wala kanay respito nako nga imong amahan.” Matud pa ni Ferdie nga nagpugong lang sa kaugalingon tungod sa gipakitang batasan sa anak ngadto kaniya. Sa kalit lang may miabli sa pultahan sa kwarto sa hospital. “Kumusta si kuya?” ni Diane nga utrong nabalaka kun unsay nahitabo sa maguwang. Midugang sa pag-ingon, “gitawgan ko sa akong classmate nga didto sa Mango sa pagkahitabong disgrasya ni kuya.”  “Dakong buhi! utro ka sang bayhana ka!” dayong bakyaw sa kamot ug gitamparos ang manghud. Mipaka ang aping sa manghud. Nakurat ang tanan.

“Kyle, naunsa ka ba? Manghud mo ang gipasakitan mo.” Ni Mylene nga daling mipataliwala. Nakugang si Diane kay gisugat man kini’g tamparos sa maguwang.

“Unsa may sala ko nimo kuya? Imo man kong gitamparos?” ni Diane pa nga nahibulong ug nagpanghapyod sa iyang aping. “Bayolenti kana kaayo tungod sa pagpakigrelasyon mo sa babayeng way breeding. Umm!..” si Ferdie nga misuntok sa apapangig ni Kyle. Nasarasay si Kyle paingon sa iyang katre. “Husto na intawon kamo niana! Husto na utang buot!” Ni Mylene nga misinggit na. Daling migakos kang Ferdie kay usban pa unta to’g kulata si Kyle, apan hugot nga migakos kaniya ang asawa. “Sige!! Mao man kaha nay imong gusto, padayon. Lakaw, adtoa ang hinigugma mong burikat! Pakasal niya. Pero mao ni timan-i, wala kay bisan usa ka dako nga masunod gikan nako! Timan-i kana Kyle. Usa pa, isipon na tika nga usa ka patay!” Ni Ferdie pa nga namula ang nawong gumikan sa kapungot sa anak. Human makasulti si Ferdie, mitalikod kini, migawas sa kwarto sa hospital. Gipuntarya ang parking area, misulod sa kotse ug misutoy sa pagpadagan.

“Kyle, nganong naingon ka man niini? Gipasubay ka namo sa hustong dalan. Tinudloan sa maayong pamatasan apan nganong nausab ka man anak?” ni Mylene pa nga naghilak.

“Sila ang nakaingon ining tanan ma.” Matud pa ni Kyle nga mitutok sa usa ka deriksiyon nga wala magtan-aw ni bisan kinsa nga naa sa sulod sa kwarto.

“Resulta nana sa pagsige mo’g kuyog ni Pia. Ang imong batasan nahisama na sab niya,” ni Diane pa. Daling milingi kang Diane si Kyle ug isog kaayong mitan-aw sa babaye. Si Mylene usab, daling miduol kang Diane.

“Diane anak, lakaw na. Pauli na sa apartment. Okay ra si kuya nimo. Lakaw na aron dili mograbe ang gubot dinhi sa hospital. Patuo nako anak.” Hangyo ni Mylene kang Diane. Mipatuo usab ang dalaga. Migawas kini apan sa wala pa masira pagbalik ang pultahan sa kuwarto sa hospital, mitingog si Kyle.

“Wala pa ta maghuman Diane, dako ka kaayog sala ining nahitabo nako karon. Gumikan anang imong pagkatabian naingon ko niini!” ni Kyle pa, dayong gisira ni Diane ang pultahan.

“Anak, wala ko masayud kun nganong naingon ka niini ka bayolente. Wala ko masayud kun unsaon tika,” matud pa ni Myelen. Mitan-aw si Kyle sa inahan. Nakita ni Mylene nga mitulo na usab ang mga luha sa anak dungan sa pagtulo sa iyang kaugalingong luha.

“Ikaw ba sab ma, supak sa among relasyon ni Pia? Sama ba sab ka nila nga gipakaubos og maayo ang babaye nga akong gihigugma? Dili ka sab uyon sa akong paghigugma sa matud nila hugaw nga babaye?” matud pa ni Kyle nga nagbakho. Nakita sa inahan sa mga mata ug sinultihan ni Kyle kun unsa niya ka mahal ang babayeng gihigugma. Milingo-lingo si Mylene nga nagpamahid sa luha ug miduol sa anak nga naglingkod diha sa kilid sa katre. “Usbon ko ma, sama ka sab nila nga dakong supak sa akong pagpakigrelasyon sa usa ka babaye nga naa magtrabaho sa lapukong dapit, ha ma?” matud pa ni Kyle. Mitutok si Mylene kang Kyle. (Ssumpayan)