Nauyam
Balikbalik madame ha?" ni Lina usa ka nurse sa Green Meadow Medical Center niagi duol sa nurse's station si Mrs. Mildred Aruga kay cleared na siya mo-check out.
Gidala na sa iyang maid iyang mga gamit ug niuna og atang og elevator kay nia sila sa ikapitong andana. Na-admit si Mrs. Aruga og 10 ka adlaw tungod sa iyang sakit sa kasingkasing. Nagkasuod sila ni Lina kay maayo moatiman og pasiyente ug mapahiyumon si Lina nga nanamilit ni Mrs. Aruga.
Nilingi si Mrs. Aruga ni Lina nga nagbarog sa counter sa nurse's station. Nikunot ang agtang sa pasiyente, niping-it, nadaut iyang buot ning sayong kahapunon. 'Simbako tawon, oy! Imo man kung gitungo! ni Mrs. Aruga niurong sa paglakaw.
Nakapanap-ong si Lina sa iyang baba sa kaulaw "sorry kaayo madame ayaw na diay og balik", ni Lina. Nikanga "dili baya ni hotel o department store ospital intawon ni unya imo kong pabalikon?" dugang ni Mrs. Aruga nagpahiyom na.
Nauyam lang si Lina kay samtang nagpaabot siya sa resulta sa board exams pagka-registered nurse, nakatrabaho siya'g hotel. Unom ka buwan siyang nag-alagad isip receptionist. May naamgohan si Lina, duna gyud diay mga establisemento nga dautan ang pag-ingon "balik-balik" sa customer sama sa ospital labi na gyud ang punerarya.
"Sorry gyud kaayo madame slip of the tongue. Tsikatsika lang unya ta sa text o facebook ni Lina. "Sige bye" ni Mrs Aruga. Nilingi sa iyang maid nga duol na sa elevator. "Bye ni Lina nagpahiyomay sila. Gisundan og tan-aw ni Lina ang pasiyente nga nisulod na sa elevator diin naghulat iyang maid hapit niya dukla iyang kaugalingon sa kaulaw. (Kataposan)
- Latest
