Si Carlo ug Fr. John - Gula 145 Wala

Wala una motingog si Cristy apan misubli sa pagpangutana si Fr John, "nasayod ka ba kun si kinsa kini si Adan?"

"Oo Father, si Carlo mao ang Adan sa sugilanon," tubag ni Cristy sa pari.

"Nasayod ka ba kun si kinsa si Carlo?" laing pangutana ni Fr. John.

"Imong higala Father, nahimo nimong kauban sa seminaryo? Ang imong giasoy, giasoy ra usab ni Carlo diha nimo?" matud pa ni Cristy. Mipahiyom ang pari midugang sa pag-ingon si Cristy, "Sa description nga imong giingon nga guwapo si Carlo, mestizo, puti, taas. Mura'g susama mo padre. Guwapo baya ka Father  pero, itom lang ka," matud pa ni Cristy.

"Kini tungod kay ako mismo mangunay man sa gimbuhaton kun duna koy ipa-construct. Mangunay og masa ilawom sa kainit sa adlaw maong napagtong ko gawas pa niana, mosaka ko sa bukid kun adunay masakiton nga nagkinahanglan kanako. Pagsaka sa bukid taliwala sa naglagiting nga kainit sa adlaw. Apan dili ko kini panumbalingon bisan pa'g maingon ako'g uling lamang may maluwas lang ko nga kalag, " matud pa ni Fr. John. Misubli sa pagpangutana ang pari, "nasayod ka ba kun si kinsa kini si Carlo?"

"Wa...wala ko masayod padre," tubag ni Cristy sa pangutana sa pari.

"Si Carlo, mao ang pari nga imong giatubang karon, ako si Carlo sa maong sugilanon, Cristy," matud pa sa pari nga mipahiyom ngadto kang Cristy nahingangha si Cristy sa gibutyag sa pari kaniya. Wala makatuo nga ang sugilanon sa kinabuhi ni Carlo nga giasoy ni Fr. John kaniya mismong kinabuhi diay sa pari nga si Fr John.

"Ha? Ikaw diay si Carlo nga gihisgotan mo sa sugilanon nga imong giasoy nako padre?" matud pa ni Cristy nga naa pa gihapon sa pagkahingangha.

"Oo ako kay nangutana ka man kun haing parokyaha si Carlo nag-alagad? Kini, mao ning parokyaha," matud pa ni Fr. John kon Carlo.

"Pagka wala ko magtuo nga imo diay'ng sugilanon sa kinabuhi ang imong giasoy nako," ni Cristy pa."Usbon nako Cristy mahimo mo kaayong isulat sa imong nobela ang akong sugilanon, apan hinaut nga usbon mo ang mga pangalan niini makalaum ba ko?" matud pa ni Fr. John.

"O padre, sure kaayo salamat kaayo sa pag share nimo sa imong sugilanon diri nako. Wala ko magtuo nga samtang nag-asoy ka sa kunabuhi nimo, ilabi na niadtong part nga drama kaayo nga nagsige'g tulo ang akong luha imo diay'ng sugilanon ang akong nabati ug nasayran. Usbon nako padre, daghan kaayong salamat sa imong sugilanon," matud pa ni Cristy.

Sa sugilanon ni Fr. John, si Cristy ang unang tawo nga iyang na share-ran sa iyang kinabuhi. Sa iyang pagkahilukapa, pagbangon, pagkausab sa dagan sa iyang kinabuhi hangtod nga napari na siya.

"Father i-remind tika nga duna kay pakumpisalon karon kaslonon ni sila dre," matud pa ni Loreto. "Okay. Unsang orasa Loreto?" pangutana sa pari. "Karon na dre naghuwat sila nimo didto sa gawas sa confession room," tubag ni Loreto. "Ingna lang nga adto nako sila pakumpisalon sa sakristiya," ni Fr. John kang Loreto. "Okay Father." Mipalayo si Loreto sa nahimutangan sa pari. Gipahibawo ang mokumpisal nga kaslonon nga adto pagahimoon ang confession sa sakristiya. Tuod man giadto ni Fr. John ang mokumpisal. Dihang naa na siya duol sa babaye nga kaslonon diin tapad usab niini ang pamanhonon...nakurat siya. Mibarog ang kaslonon. "Kamo ang mangumpisal? Kamo ang kaslon?" pangutana sa pari.

"Yes Father, maoy among nasabutan nga ikaw ang gusto namong maoy mokasal namo," matud pa sa babaye.

"Kumusta kana Fr. John?" matud pa sa lalaki nga kaslonon. Mipahiyom ang pari ug naglingo-lingo.  (Sumpayan)