Pag-asoy sa tinuod nga gibati - Gula 142

Mihunong sa pagsulti si Sandra nagtigom og igong kusog aron masulti niya ang buot masulti sa gikaatubang. Human sa pipila ka segundo, miinom sa iyang softdrink ang babaye, milingiw sa makadiyot. Gitan-aw ang mga tawo nga nanglabay sa maong fast food chain makita ra man ang mga tawo nga molabay kay bildo man ang bongbong niini. Laing pipila ka segundo nga kahilom, dayon hinay nga giliso ni Sandra ang ulo paingon ngadto kang Carlo, samtang si Carlo usab, wala buhi-i sa  iyang panan-aw ang dalaga nga iyang gikaatubang sa paglingkud.

Gusto usab ni Carlo nga masayran ang buot nga isulti sa dalaga. "Gusto ka bang masayod kun si kinsa kining maong lalaki nga akong gipaabot? Naabot na siya nagpasalamat ko niining adlawa kay ania na siya sa akong atubangan. Ikaw ang buot kong ipasabot Carlo," ni Sandra pa.

Mikuha sa iyang soft dink si Carlo miinom kini dayon gibutang pagbalik sa lamesa gihinol niini ang baso nga nag-umog tungod sa kabugnaw, mibuhi gikan sa paghikap sa baso ug gitan-aw niini ang pipila ka tudlo nga nabasa gikan sa nag-umog nga baso sa soft drinks. Nanghupaw og mobo si Carlo, pilit nga mipahiyom mitan-aw sa dalaga.

"Nahigugma gyud diay ka nakong tinuoray?" matud pa ni Carlo miduko si Sandra nga nagkanayon, "unang adlaw sa atong panagkita didto sa bus paingon sa Ginatilan.. wala ko damha nga mobati ko'g gugma sa lalaki nga una pa lang nakong nakita ug gikahimamat," ni Sandra pa. "Apan nganong dihang nanguyab ko nimo, wala man ko nimo sugta?" ni Carlo pa."Tungod kay aduna pa koy pagduha-duha niadtong tungora ilabi na kay mura ta'g iring ug iro nga magsige'g lalis, magsige'g away.

Pero sa tinuod matag pulong sakit nga malibkas ko diha nimo, akoy gisakitan," ni Sandra pa nga hinay'ng giisa ang ulo. Nakita ni Carlo nga may migitib nga luha sa mga mata sa dalaga mikuha sa iyang panyo si Carlo, gitunol ngadto kang Sandra aron magamit sa pagpahid sa mga luha nga andam nang moagas. Hinay kining gikuha ni Sandra sa bahin ni Carlo wala siya makasabot kun unsay angay niyang bation. Gikaatubang niya ang babaye nga makausa ka higayon niana iyang gihigugma. Babaye nga medyo nakapasakit sa iyang kasing-kasing. Babaye nga tinuod sab diay nga nahigugma kaniya. Parionon na si Carlo walay laing gikatubag si Carlo kang Sandra gawas nga mitambag kini nga huna-hunaon una sa makadaghan ang gibati sa babaye. Wala usab niya sanunga ang babaye kalabot sa pagpaabot sa pagbalik sa lalaki nga maoy gusto niining ikauban sa tibuok nga kinabuhi. Nakita ni Sandra sa awra sa lalaki ang dakong kausaban ilabi na ang sinultihan niini. Medyo may pagkabarumbado nga manulti si Carlo nga way preno, dili maghuna-huna kun may masakitan ba sa mga pulong nga mogawas sa baba niini. Apan kaniadto ra kini nakaingon si Sandra sa iyang huna-huna nga nausab na gyud si Carlo. Mas misamot ang gibating gugma ngadto sa lalaki pinaagi sa lihok ug sa sinultihan niini.

Tok! Tok! Tok! Hinay nga pagpanoktok ang nabati sa duha ka tawo nga nagsultihanay sa usa ka gamay nga opisina milingi ang duruha ngadto sa tawo nga nanoktok.

"Padre, may bisita ka," si Loreto nga sakristan mayor sa parokya nga naa mahimutang sa norteng bahin sa Sugbo."Fr. John, maputol na sad ang atong panagsultihanay." Matud pa ni Cristy nga usa sa parokyano. "Sa sunod adlaw na lang sab Cristy. Aduna pay daghang higayon." Matud pa ni Fr. John. "Gusto kong masayud kun nadayon ba pagka-pari si Carlo Fr. Kun ang panagkita nila pagbalik ni Sandra mao bay nahimong babag sa pagsulod sa pagka pari ni Carlo," ni Cristy nga excited nga masayud sa sunod nga mahitabo sa sugilanon ni Carlo."Pasensiya na Cristy. Pero may daghan pang adlaw nga matapos ko ra pag-asoy nimo ang kinabuhi ni Carlo. Unsaon nanawag sa cellphone kining akong bisita ron. May importante siyang tuyo nako. Ugma, balik dinhi aron masayran mo kun nadayon ba pagkapari si Carlo o nagminyo ba sila si Sandra," pulong pa ni Fr. John wala'y nahimo si Cristy gawas sa pagawas ug nananghid sa pari nga mopauli. Samtang gimanduan usab sa pari si Loreto nga pasudlon ang giingong bisita unsa may kalabutan ni Father John sa sugilanon sa kinabuhi ni Carlo?  (Sumpayan)