Panagtagbo pagbalik Kataposang lima ka adlaw - Gula 141

"Unsa man nang pangutanaha Tribor? Mura'g dili gyud ka gusto nga magpari ning atong amigo dah. Dili pa ka ana nga may amigo ug suod nato nga pari kun magpabunyag ta o kaha kinsay mamatay nato duna nay momisa nato nga libre ug kada adlaw sa iyang misa iapil ta sa pag-ampo aron dili ma impiyerno ang atong mga kalag?" matud pa ni Pikot nga nagngisi.

"Mas grabe imoha kay naghisgot ka'g patay diha!" Matud pa ni Tribor midugang sa pag-ingon, "wala man ta kahibawo sa panahon. Duna man gani hingpit na gyung pari migawas sa bokasyon kay naminyo, unsa na kaha ni si part Carlo nga wala pa maordinahi?" ni Tribor. Migunit sa abaga ni Tribor si Carlo ug nagkanayon, "kun unsay gimbut-an sa Ginoo, tumanon ug sundon mao ra gyud ni bugtong nakong ikatubag, Dios na ang mag-igo kun unsay iyang gustong mahitabo sa akong kinabuhi," ni Carlo pa.

Alas nueve sa gabii, hinayhinay nang nanguli ang mga bisita diha usab ang mga iyaan ug uyoan ni Carlo, lakip na si Kevin nga suod niyang ig-agaw nananghid na sab si Carlo ngadto sa iyang mga ginikanan nga mobalik na sa iyang gi-estaran.

Pagka-ugma niana kay Domingo, nakahukom ang parionong si Carlo nga mosuway siya'g adto og mall. Gusto siyang makakita sa mga kausaban niini dihang nakaagi siya sa usa ka shop diin mga religious items ang mga baligya, misulod siya nagtan-aw og mga libro nga balasahon gibasa niya ang cover niini, apan dihang pagyanghag ni Carlo, may nakita siya sa atbang sa maong shop sulod sa mall. Usa ka babaye, milingi kini sa iyang nahimutangan nakita niya ang panagway sa maong babaye ang kakurat. Mingisi kini kaniya ug mibawos usab sa pagpahiyom si Carlo naka white t-shirt lang si Carlo ug naka black nga long pants ug nag sandalyas migawas ang lalaki sa maong shop samtang ang maong babaye, miduol usab kaniya.

"Kumusta ka na, Sandra?" ni Carlo pa nga mapahiyomon kay nakita ang ikaduhang babaye nga nakapapitik sa iyang kasing-kasing. Babaye nga sa iyang pagtuo kaniadto iyang gihigugma pag-ayo human siya ayri sa iyang gugma ngadto kang Marissa.

"Okay lang," ni Sandra pa, mitutok si Sandra sa pari-onon gikan sa tiil hangtod na sa ulo. Mipahiyom kini'g dyutay ug nagkanayon, "mura'g dunay nausab nimo desente kaayo kang tan-awon. Desente apan nagpabiling guwapo ug misamot pa gyud ka guwapo," matud pa ni Sandra mipahiyom si Carlo.

"Salamat. Minyo kana? Kinsa may imong na bana? Pila nay inyong anak? Asa man ka karon nagpuyo?" pusot-pusot nga pangutana ni Carlo kang Sandra.

"Tagsa-tagsa lang Carlo usa-usahon nato'g tubag imong pangutana ha pero ang usa ka tubag nako nimo maoy tubag sa uban pa nimong mga pangutana," ni Sandra pa nga nagpabiling mapahiyomon ngadto ni Carlo mingisi lang sab si Carlo.

"Wait, unsa kahay maayo kun manulod ta'g snack bar? Unsa ba nga nia man ta dinhi  mag estorya? Mangita ta'g snack bar aron magkasultihanay ta'g maayo," matud pa ni Carlo tuod man nanulod sila sa usa ka inilang fast food chain sa Pilipinas. Human mikaon si Sandra og pipila ka fries diin wala pa mahilabti ang burger niini, mitan-aw siya kang Carlo. Mga tutok sa usa ka eba nga ingon og adunay buot ipasabot pagtutok nga ingon og nagdalag mga pulong nga daling nasabtan ni Carlo. Pagpahiyom sa usa ka babaye nga nagkahulogan kini og adunay gusto sa gipahinungdan sa maong pahiyom.

"Trayenta kapin na ko Carlo, sa akong pangidaron wala pa ko maminyo kana kay may gipaabot ko nga moabot.

Gisaad ko sa akong kaugalingon nga kun dili siya moabot sa akong kinabuhi dili ko magminyo kay maoy akong gidamgo nga siya ang mohatod nako sa altar sa kaminyoon," matud pa ni Sandra ug si Carlo milad-ok sa gisuyop niyang softdrink pinaagi sa straw. Kinsa man diay kaha kining gipasabot ni Sandra nga maoy iyang gipaabot? (Sumpayan)