Espiritu sa kaulag - Gula 140

Samtang diha na sa may pusod nga bahin ang tuong kamot ni Carlo mas mikusog pa ang tingog nga iyang nabati nga nagkanayon, 'sige pa Carlo, padayon.' Apan mihunong paglihok ang kamot ni Carlo diha sa may pus-on, nagkanayon sa iyang huna-huna, 'apan sala kini dili kini mahimong buhaton.' Apan ang dautang espiritu padayon nga naghung-hong kaniya, 'dili ba nga mahimo ra man kang mangayo og pasaylo sa imong nabuhat nga sa pagtuo mo dili husto? Pangumpisal lang ini'g ka ugma, isugid ang imong sala wala'y makabalda sa buot mong buhaton. Ayaw pugngi ang kainit kay kun pugngan mo kini magmahay ka lang, matud pa sa tingog.

Mipiyong si Carlo gibalik ang tuong kamot sa may dughan ang walang kamot, mihiram sa iyang kilid diin gipangita ang iyang rosaryohan, giabot ang tanang ngipon nga ingon og nagpangagot, nag-ampo sa mainiton gayud ug nagkanayon sa huna-huna, "Sa ngalan ni Jesu Kristo, pahawa dautang espiritu sa kaulag. Ayaw ko'g tintala pahawa, in Jesus Name!! In Jesus Name! Pahawa karon dayon!' Milibkas og pipila ka pulong sa pag-ampo si Carlo hangtod nga nahanaw ang gibating kainit sa lawas. Pipila ka minuto gibati og duka ang ulitawo hangtod nga nakatulog.

Kun sa gawas sa seminaryo sa wala pa makadesisyon si Carlo nga magpari daghang mga pagsulay, mga tentasyon nga nasugatan apan triplihon pa diay sulod sa seminaryo maong gipahugtan pa ni Carlo ang iyang pag-ampo aron dili siya mahitumpawak sa kadaot. Dili makasala aduna may mga ginagmay nga sala, apan iya dayon kining ikumpisal sa pari. Grabe ang pakigbisog ni Carlo batok sa mga tentasyon.

Milabay ang mga katuigan, natapos ni Carlo ang Theology ug uban pang mga subjects. Sa wala pa siya hingpit nga mapari aduna pa siya'y mga community services. Usahay mopauli siya sa ila aron bisitahon ang pinangga niyang mga ginikanan. Mata'g pauli niya sa ila dili masipyat aduna gyu'y salo-salo. Ang iyang mga barkada kanhi usahay iyang imbitaron aron makigsalo sa usa ka panihapon.  Ingon og dili gihapon makatuo sila si Tribor ug uban pang mga barkada sa hingpit nga kausaban sa kanhing playboy nilang higala. Kasagaran sa iyang mga barkada, nangaminyo na usahay magkumedyahay ang mga barkada labi nag magkatapok kini.

"Ayaw ko'g ingna part...ahm,.part unay akong itawag nimo ha kay dili pa man ka hingpit nga pari. Unya ra ko motawag nimog padre kun ordinahan kana gyud," ni Tribor pa unya mipadayon sa pag-ingon, "ayaw ko'g ingna part nga sa gidugayon nimo'g estar sa seminaryo wala gyud ka makasala?"

"Usahay dunay mga tentasyon pero ihangad ko na lang sa langit," matud pa ni Carlo nga mingisi.

"Wala ka masuya namo part, may anak na mi si part Tribor? Duha ako, kang Tribor duna na sad siyay tulo. Nindot kaayo paminawon part nga duna kay matawag nga anak gikan sa trabaho kapoy pero mawala labi nag makita nimo ang imong mga anak," matud pa ni Vincent.

"Duha ka mga anak? Tulo? Wala ra na sa ako unyang mamahimong mga anak part. Kay kun mapari na unya ko, libuan ka mga anak ang aduna unya ko may mga asawa, pakapinan pag mga bana nga mga parokyano sa simbahan," pagkumedya pa ni Carlo.

"Bana? Oy, ayaw ko'g ingna nga nasilahis kana karon? Kun wala ka mosulod og seminaryo dili ka masilahis mag-sure ta ini part," matud pa ni Pikot. Daghan pang pagpangumedya nga maoy nahimo niining kalingawan sa grupo. Milanog ang tibuok dapit sa katawa ug mga buhak-hak sa grupo sa kalakin-an diin nahaapil niini si Carlo.

"Part, sa atong grupo, way usa nga wala masayod kun unsa nimo ka mahal si Marissa kun ugaling magpakita nimo si Marissa ug mohagad nimo'g kasal, mopadayon ka pa ba sa pagkapari o dawaton mo ang tanyag ni Marissa nga kasal? Unsay imong pilion?" ni Tribor nga nakapahilom sa grupo samtang si Carlo mitutok sa namulong nga si Tribor dayon nanghupaw. (Sumpayan)