Digong way klaro

Gisupalpal ni Secretary Mar Roxas si Mayor Rodrigo Duterte og listahan sa mga nakabenepisyo sa PhilHealth nga mga taga Davao human ang mayor miingon sa ikatulong debate sa mga presidentiables nga wala’y mga taga Davao nga nakabenepisyo sa PhilHealth. Agi og reaction sa pagsupalpal kaniya sa listahan sa mga nakapahimulos sa PhilHealth ang mayor namasangil nga mga peke kini. Pagka way klaro ni Digong abi man lang kay naapiki namasangil na pud og peke. Pagka peligro sa Pilipinas kun mao ang mosunod nga presidente.

Sa pinakauwahi nga resulta sa mga survey nga gipahigayon nag-una gihapon si Mayor Duterte sa mga kandidato sa pagka presidente bisan pa man sa iyang kabugoy o binugoy nga istilo sa pakigdebate diin inay kay iladlad ang mga pagpasabot sa iyang programa sa gobiyerno nga iyang dumalahon kun maoy modaug ang iya hinuong pagkabugoy ang iyang gipaabot ngadto sa mga botante nga nagpaabot sa iyang mga pagpasabot sa mga programa nga iyang himuon kun ugaling mapresidente. Maong wala gyu’y klaro si Digong. Hinuon mura’g epektibo ang iyang istilo kay misaka man ang iyang ranking sa mga presidential survey nga gihimo sa SWS ug Pulse Asia. Labing seguro niining mga panahona ang mga tawo nga gipangutana sa mga nag-survey gusto pa nilang ang bugoy nga mayor maoy mahimong presidente.

*  * *

Mibisita dinhi sa dakbayan sa Sugbo kagahapong adlawa ang kongresista sa Tacloban nga si Martin Romualdez kay nakigkita sa mga Persons with Disabilities kay padayon niya kining gikonsulta mahitungod sa ilang kahimtang aron mapun-an pa ang mga benepisyo nga ilang madawat pinaagi unya sa mga balaudnon nga iyang  pagapandayon. Sa tan-aw nako seryoso si kongresista Romualdez sa iyang krusada nga malasakit ug serbisyo.

Una na nga giamendahan ni kongresista Romualdez ang benepisyo sa mga Persons with disablities nga bag-o lang gipirmahan ni Presidente Noynoy Aquino aron mahimong balaud ug gilaraw nga himuon nga balaud ang Pantawid Pamilyang Pilipino Program o 4P's.