Sandra

Gula 66

"Aray manukol?" ni Carlo pa.

"Dah sakit? Ganahan ka nga kining takong sa akong sandal ihapak nako sa imong ulo?" Sa babaye pa nga miaksiyon na'g hubo sa sandal nga gisul-ob aron kuhaon ug ihapak sa ulo sa lalaki.

"Oyy oy oy... komedya ra gani to ikaw ba sensitive kaayo ka oy," matud pa ni Carlo nanghupaw na lang ang babaye. Sa huna-una ni Carlo nga may lalaking mipasakit sa maong babaye nga iyang tupad maong ingon na lang niini ang iyang pagtagad sa mga lalaki dili sab niya kini mabasol. "Ganiha ra tang nagsige'g estorya pero wala pa gyud ka mosulti sa imong ngalan Carlo ko," ni Carlo pa. Nga sa maong higayon wala na mitunol sa iyang kamot.

"Carlo lagi ka nahibawo na ko sa imong ngalan sige'g balik-balik" pinabundak nga tuno sa babaye.

"Di ba matawag og unfair ikaw nahibawo na sa akong ngalan pero ako wala gyud ka mosulti sa imong ngalan pwede'g mahibaw-an ang imong ngalan?" Matud pa ni Carlo.

"Sandra," mubo'ng pulong sa babaye pero pinabundak gihapon.

"Hayyy finally, mitug-an na gyud sa iyang ngalan," ni Carlo pa nanghupaw og lawom kaayo ang babaye.

"Pwede'g masayran kalabot sa imong kasing-kasing?" Pangutana pa ni Carlo kang Sandra.

"Dili na ko gusto mahinumdom ug usa pa karon pa ta nagkaila mura'g dili right time nga isulti nako nimo ang mga personal about nako  ilabi na sa gugma," matud pa sa babaye.

"Okay akong girespito ang imong gusto  well asa man diay ka manaug?" Pangutana sa lalaki.

"Sa Ginatilan ko," tubag ni Sandra.

"Really? Sa Ginatilan sad ko sa Poblacion," ni Carlo pa.

"Parehas ta so, magdungan diay ta inig kanaug," matud pa sa babaye.

Daghan pag gi-estoryahan ang duruha nalingaw si Sandra sa humor sa lalaki nagsige na lang ni’g katawa kay magpakatawa man sab si Carlo. Unang adlaw pa lang gani sa ilang panagkita mura'g dugay na silang managkaila wala na lang nila mabantayi nga naabot na sila sa ilang destinasyon nanaug ang duha misakay'g una og tricycle si Sandra.

"Una lang ko nimo Carl, nice meeting you," panamilit pa sa babaye sa lalaki nga naa sulod sa tricycle.

"Bye Sandra," Pag-wave sad ni Carlo ngadto ni Sandra.

"See you when I see you," ni Sandra pa ug wala buwagi sa iyang panan-aw ang nagkalayo nga tricycle nga gisakyan ni Sandra. Mipahiyom ang ulitawo hangtod nga nawala na sa iyang panan-aw ang maong tricycle. Nangita na sab siya'g tricycle nga iyang kasakyan paingon sa balay sa iyang lola. Dihang naabot na siya sa balay misugat kaniya ang iyang lola pipila sa iyang mga paryente ug mga ig-agaw. Human maghimamatay gisaw-an nila ang giandam nga pagkaon alang sa iyang pag-abot. Human nila'g pangaon miadto sa veranda si Carlo, gianinaw ang tibuok dapit diin makita dili halayo ang dagat. Tin-aw ug maayo ang panahon ancestral house kini sa ginikanan sa iyang inahan mikuha og usa ka stick nga sigarilyo si Carlo ug gidagkotan sa dala niining lighter.

"Carlo?" Nangunot ang agtang sa inahan nga miduol sa ulitawo.

"Ngano ma?" Pangutana sa anak.

"Kanus-a ka lang nakakat-on og panigarilyo!?" Pangutana  pa sa inahan nga nanghinawak sa atubangan sa anak. Nalimot diay si Carlo nga wala masayod ang inahan sa iyang bisyo sama sa pagpanigarilyo, pag-inom, labaw sa tanan sa iyang pagkahimabaye usab sama sa amahan. Wala masayod ang inahan nga nagsugod nag panigarilyo si Carlo dihang 13 anyos pa lang kini  tinago-tago hangtod nga milarga ang iyang mama dihang 14 anyos pa lang siya.  Natulala si Carlo nga mitutok sa inahan samtang ang sigarilyo nag-ung-ong sa iyang baba dili sab ma-drawing ang panagway ni Gina nga nagtan-aw sa anak. (Sumpayan)