Heart-broken

Gula 65

"Sagpa? Aw kun mao nay imong ikalipay ug makighigala na ka nako pwede ra, pwede ra sad nga imong i-times two upat ka sagpa mura’g buy two - take two," ni Carlo pa nga medyo gidudo ang pikas aping ngadto sa babaye.

"Dili ko ganahang makig-estorya nimo!" matud pa sa babaye.

"Aw okay," pulong pa sa lalaki ug gibalik ang nawong sa kanhing posisyon. "Hilom na bi," sa babaye pa.

"Okay," mubong pulong sa lalaki.

"Ayaw ko’g pakigsultihi ha hilom na diha dili na ko ganahang  makadungog sa imong tingog nakasabot ka?" matud pa sa babaye. Wala na motingog ang lalaki. Gipalihok ang kalimutaw sa babaye paingon sa kilid nga nahimutangan ni Carlo nga wa ilihok ang ulo.

"Hoyyyy!!!", sa babaye pa, ug mipadayon sa pag-ingon, "matud ko nakasabot ba ka?"  Pero wala gihapon motingog si Carlo. Straight forward ang panan-aw sa lalaki. Mipadayon sa pag-ingon ang babaye "hoyy! Bungol ka ba? Matud ko, kun nakasabot ba ka tingog oy," matud pa sa babaye nga na-imberna na. Hinay'ng giliso ni Carlo ang ulo paingon sa babaye.

"Di ba dili na ko nimo patingugon? Karon mamugos ka nga patingugon ko? So  klaro na kaayo nga gusto sab kang makig-estorya nako?" pulong pa sa lalaki.

"Ambot nimo!" Medyo naulaw ang babaye.

"Kamong mga babaye no usahay dili masabtan ang batasan kami sang mga lalaki, magsige'g adjust. Sige’g sabot gusto gyud ninyo kamo maoy perming sabton hahayyy ning mga kaliwat ni Eba usahay dili masabtan ang batasan," matud pa ni Carlo.

"Kamo sang kaliwat ni Adan lami kaayo’g mga pulong mura’g katuhoan-dili. Kusog mamulatik, kusog mopasakit sa feelings sa mga babaye paasahon pero kun makuha na ang tuyo dayong talikod kay mangita na sad og mabiktima nga paasahon ug pasakitan," matud pa sa babaye nga medyo seryoso ang tono.

"Wow may pinagdaanan? Based on personal experience?" ni Carlo pa wala motingog ang babaye nanghupaw kini og lawom kaayo. Ug mipadayon sa pag-ingon ang lalaki "condolence." Matud pa ni Carlo nga gitunol na sab ang kamot sa makausa pa.

"Unsa? Unsay condolence?" sa babaye pa nga medyo nakurat sa gipanulti sa lalaki.

"Condolence mao diay nga ingon og suko kaayo ka namong mga lalaki kay may pinagdaanan diay ka. Miingon ko nimo'g condolence kay I'm sure patay na ang imong kasing-kasing. When man ang lubong kay sa paghatud na man lang?", ni Carlo pa dayong ngisi  sa tago nalingaw sab ang babaye sa ulitawo.

"Yabag!",payam-id pa konohay sa babaye kang Carlo.

"Kinsa ba gud nang lalakiha nga mipasakit nimo? Sulti'g kinsay iyang ngalan ug taga diin siya," pangutana sa lalaki.

"Ngano man? Imong kulatahon?" pangutana sa babaye agi'g tubag sa pangutana sa lalaki.

"Dili," ni Carlo pa.

"Ha? Unsaon man diay nimo? Nganong nangutana man ka’g kinsay iyang ngan ug taga diin siya?"

"So gipasakitan gyud diay ka’g lalaki heart- broken diay ka mao diay karon nahibawo na ko sa hinungdan nga morag bitter kaayo ka sa mga lalaki."

Ug mipadayon sa pag-ingon, "gusto lang kong mahibawo kun kinsay iyang ngalan ug taga diin siya aron ako siyang maadto ug akong i-congratulate. Akong ingnon nga sakto ka sa imong desisyon nga imong gitalikdan ang imong uyab kay maldita, estrikta ug labaw sa tanan, arte," ni Carlo.

Pooogggg!!! nakalitan si Carlo kay gidukol ang iyang ulo sa babaye. (Sumpayan)