Prayer
Katapusang adlaw ron sa bar review class. “Sa di pa ta magbuwag rong gabhiona, gusto ko nga motubag og mga pangutana gikan ninyo. Bisa’g wa nay labot sa atong subject matter,” ni Atty. Fred Taquip, buotan ug masinabtanon kaayo nga lecturer.
“Sir” ni Eugene niisa sa tuong kamot. Nitindog si Eugene. “Unsa may pinakabililhong tipik nga ikapamahin nimo ngari namo?” ni Eugene. “Well, natudlo na nako ang angay ninyong makat-unan mahitungod sa balaod, apan di nako ikaulaw ang pagsugilon niini.”
“Ako ang pinakahambugero nga law student sa akong panahon. Consistent valedictorian ko gikan sa elementary ug high school. Suma Cum Laude ko pag-graduate sa pre-law. Magna Cum Laude ko paghuman sa abogasya. Way makapildi nako’g debate. Apan duna ko’y usa ka classmate nga mao ra gyu’y mosukol nako’g debate bisa’g sigeng kapildi. Ako lang pirming insultuhon ug bugalbugalan. Di gyud manoyo. Taas og pasensiya. Nagpaubos lang. Ako siyang tulisukon sa pag-ingon “You can never defeat me, Charlie! Maputi una ang uwak”.
“Nagdungan mi’g kuha og bar exams. Dakong balisong. Nahagbong ko. Nakapasar siya. Hapit ko niambak sa taytayan sa Mactan. Nag-hunger strike ko og duha ka semana sulod sa akong lawak. Nanarangka ko. Wa ko nipasulod og bisan kinsa. Nabalaka akong mga ginikanan ug mga igsoon. Unya may nanuktok. Wa ko nagtingog.
“Fred, si Charlie ni. Pasudla ko. Naa koy isulti nimo”, niya pa. Adlaw na ron sa panudya, sa hunahuna nako. Andam ko pagdawat kun unsay ibawos ni Charlie nga insulto ug bugalbugal ngari nako. Gipasulod nako. “Niduyog ko’s imong kasub-anan. Kay giila tikang best friend ug idol tika,” ni Charlie. Gigakos ko niya. Nakahilak ko. “Apan kinahanglang mo-bar ka pag-usab. Kay you have the potential. Ang kulang lang nimo, prayer. Kay ‘man proposes, God disposes’. Pangayoa gyud sa Ginoo imong kalampusan. Ayaw pagsalig sa kaugalingon lang,” ni Charlie. Imbis iya kong bugalbugalan, gidasig hinoon ko niya. Nahanaw akong kahambugero.
“Naminaw ko niya. Kay kun wa pa, wa unta ko karon atubangan ninyo,” ni Atty. Taquip. Mapahiyumon. Nipakpak si Eugene. Nanindog ang tanan niyang kaklase. Namakpak sab sila.
- Latest