Daman Sa Udtong Tutok

Gula 55

Paglabay sa pipila ka adlaw, nabaniog na sa among baryo ang akong pagpauli nga usa ka dakong mabdos. Tungod niini, si Jack nahiagom sa pagbugalbugal sa mga himantayon. Gitawag siya nila og Salvador del mundo.

Si Jack ingon sa dili makadawat sa nahitabo kanako. Kanunay siyang maghuboghubog. Gikaulaw niya ang akong pagmabdos nga laing lalaki ang amahan sa bata. Usa kini ka dakong sagpa sa iyang pagka-lalaki.

Pero bisan naglagot na si Jack kanako, dili gayod siya makahimo sa pagpasakit kanako. Kaha, nakaamgo na pud siya sa iyang pagkuwang ngari kanako. Sa iyang pagka-iresponsable nga bana ug amahan sa among mga anak.

Nunot sa pagpanglabay sa mga adlaw, misamot ang pagbugalbugal sa mga tawo sa among dapit ngadto kang Jack.

"Naunsa ka na man, Partt," matud ni Dassi, ang labing bugalbugalon sa among dapit. "Lain ang naglublob sa imong asawa pero ikaw ang magtil-og."

Naglagot si Jack sa gisulti ni Dassi. Kaha wala na siya makaantos sa mga pagbugal-bugal, gidunggab niya si Dassi.

Gidunggab ni Jack si Dassi sa makadaghan hangtod nga namatay kini. Apan si Jack daw sa gipanuwayan na. Nanghagis siya. Naglakaw siya sa karsada nga nanghagit og away. Giwarawara niya ang iyang jungle knife nga nabulit sa daghan kaayong dugo. Nagbahis siya'g maayo.

"Kinsa pay mangahas sa pagbugalbugal sa akong pagkatawo kay akong putlan og dila," nagkanayon si Jack sa tumang kamalaguton.

Nagpadayon si Jack sa pagpanghagis. Ang katawhan sa among baryo nanirado sa ilang kabalayan. Nanirado usab kami sa among balay kay tingali'g mosaka si Jack ug may buhatong daotan kanamo. Wala madugay,dihay mga tanod nga nangabot aron pagbadlong ug pagdakop kaniya. Apan wala sila makahimo sa pagdakop kang Jack. Misukol si Jack kanila ug dihay duha ka tanod nga nasamdan sa gigunitan niyang hinagiban.

"Patyon ko ang tanan nga nagpasipala sa akong pagkatawo," ni Jack pa nga nagsubay sa dalan nga nagsige og panghagis. Mibati ako'g kahadlok. -- Sumpayan pa