Balaan pa sa Diyos

Dunay batasan si Novie nga magduwaduwa sa manebela sa iyang sakyanan kun magmaneho. Labi na kun mingaw ang karsada. Usa ka buntag, gipamalihog siya’s iyang kapikas nga mopalit og Banat News sa merkado.

Kay kada buntag siya tig-hike, gikapuyan na siya’g lakaw. Kay human na siya’g hike sa paghangyo sa iyang kapikas, gidrayban na lang niya ilang Toyota Corolla nga maroon.

Nag-ikis-ikis iyang kotse padulong sa merkado kay mingaw ang karsada. Mahinumdum man god siya sa bayongbayong pa siya. Nga magdrayeb og bump cars. Binuangan niya ang manebela.

Kalit may motorsiklo nibusina sa iyang luyo. Unya nisikit sa kotse dapit sa wala. May gisulti ang nagsakay sa motorsiklo unya gitulisok si Novie. Wa siya kaklaro’g dungog sa gisulti kay sirado ang bintana sa kotse. Tataw sa hitsura sa tawo nga nasuko siya. Gipadaplin ni Novie ang kotse ug gipahunong. Nisunod ang motorsiklo ug niurong dapit sa walang habig sa kotse.

Nangabli sa walang bintana si Novie. “Unsa may problema, bay?” ni Novie. “Hubog ka?! Kay nag-ikis-ikis man ka?!” sa tawo. Sa tan-aw ni Novie, dili man ni pulis tawhana. Unya mora’g pamilyar niya ang hitsura. Iyang gitubag. “Kun moingon ko  hubog ko, dakpon ko nimo?” ni Novie. “Dili man ko, pulis. Pero i-report tikas pulis!” sa tawo.

Ug nahinumdum na si Novie kun diin ni niya makit-i tawhana. Manghuhungit og ostiyas sa simbahan. Ug matud pa ni Celsa, iyang kapikas, way silingan ning tawhana kay garboso ug mapahitas-on sa nga tanan. Kada adlaw nagserbe sa simbahan. Apan ang batasan di makaon og iro.

“Di ba lay minister man ka?” O. Ngano man diay?” “Unsa may nakat-onan nimo sa pagka lay minister? Sa imong tan-aw balaan ka pa sa Diyos?”

Wa na nitingog ang tawo. Niduko. Nipadagan sa iyang motorsiklo. Nakaamgo nga dili diay hubog si Novie. (Katapusan)