Kalibkib

Sa ilang panagkita ning hapona sa sulod sa matahom nga Plaza Independencia, managsamang nagkatinutokay sila si Marman ug Myles. Nagsaka kanaog ang ilang tinan-awan, gikan sa ulo ug hangtod sa tiil sa tagsatagsa nila ka mga pamayhon.

"Kalibkib Myles, ikaw ba ni...?" ni Marman nga hugot milamano kang Myles nga maukiton gihapong nagsud-ong sa porma ug bigot nga pamayhon sa dalaga.

"Kalibkib Mar, ikaw ba sab ni....?" nagpahiyom si Myles nga padayong nagsud-ong sab sa pamayhon sa ulitawo nga bus-ok ug macho na kaayo og lawas.

"Wa ko magdahom nga sa paggradwar nato sa elementarya kanhi nga yagpis kaayo ta'g pamayhon nga mora'g kalibkib, nausab na ang tanan, Myles! Bida, porma ug bigot na kaayo ka'g lawas...!"

"He-he-he!  Bitaw, Mar! Tungod sa kanunay natong pagkaon sa kalibkib nga salin kanhi sa mga kinudkod ni Nang Lita nga magtuno ug magluto og bibingka, mora sab og kalibkib kanipis ang atong lawas kanhi, Mar...!" Nangatawa sila si Marman ug Myles nga nagtupad na og lingkod sa sementadong lingkuranan sa plaza.

 Managsilingan sila ug managklasmeyt sa elementarya. Parehas sila nga mga anak og kabos nga mga ginikanan sa eskuwater. Kanunay silang mag-atang sa mga bagol nga kinudkoran ni Nang Lita matag hapon ug ila nga lugiton ang salin nga kalibkib aron kan-on. Maoy hinungdan nga nahimo nilang angga ang kalibkib sa matag usa. Human makagradwar sa elementarya, nagkalinay-anay sila si Marman ug Myles.

"Human sa 15 ka tuig, wa ko magdahom nga sa paghibalik ta dinhi sa siyudad sa Sugbo, pulos na ta mga propesyonal, Myles...!" "Bitaw, Mar! Kinsay magdahom nga ang duha ka kabos nga mga bata nga hingaon og kalibkib, nahimong nagmalampuson. Usa na ikaw ka lisensiyadong civil engineer, Mar! Ug ako, usa na sab ka CPA...!"

"Ug ang nakanindot kay sa edad nga 27, parehas pa tang ulitawo ug dalaga, Myles! Panahon na nga hiusahon ta ang duha ka kalibkib sa atong kagahapon...!"

Miyango si Myles nga nagpahiyom. Hugot silang nagkatinutokay si Marman. Nasayod silang duha nga parehas sila og mga pagbati. (Kataposan)