Himantayon

Dear Tita Salie,

Ako si Mrs. Fernando, minyo taga Talibon, Bohol. Naproblema ko sa akong silingan nga labihan ka himantayon. Hilig ra ba g’yud magpadungog-dungog. Kun dili pa lang lagi ko magpugong sa akong kaugalingon, ambot lang, gubot g’yud kanunay. Maayo kaha nga ako ning patolan aron motagam? Pasabta ko.

* * *

Dear Mrs. Fernando,

Ayaw kahibulong nga may tawo g’yud nga ingon niini sukad pa sa sinugdan. Hinumdomi ang yawa kanunay namantay kun kinsa ang tawo nga matarong sama kang Job. Apan si Job wala magpadaog. Mahimo nga mabuntog usab nimo kining mao nga problema pinaagi sa pagsunod sa mga tambag sa Bibliya nga  nag-ingon: “Ayaw pagpadaog sa daotan kun dili daoga ang daotan pinaagi sa maayo.” Matud sa Bibliya “Ayaw balosi og daotan si bisan kinsa, tungod sa iyang daotan buhat. Ayaw batoki og daotan ang ilang mga buhat. Hinuon, iampo kini sa Diyos nga mohunong na kay ang Diyos ra maoy angay nga manimalos sa mga daotan ug dili kita. Hupti kanunay nga malinawon ang imong kinabuhi pinaagi sa pagbuhat og maayong butang atubangan sa tanang mga tawo. – Tita Salie