Bilyako nga polis - Gula 11
May giandam na diay’ng daan nga affidavit ang imbestigador aron pirmahan na lang ni Elmer. Nagmatuod kini nga kapin g’yud sa 200 gramos nga shabu ang nakuha gikan sa balay ni Victor nga amahan ni Fatima.
Wala dayon pirmahi ni Elmer ang affidavit. Pagkasayod sa ilang opisyal, wala siya pugsa pagpirma apan gipasidan-an siya nga makapasamot kini kabug-at sa iyang kaso nga atubangon.
Naglibog na pag-ayo si Elmer ug mao nga bisan kontra-gusto, gipirmahan niya ang affidavit. Ang iya na lang diay’ng pirma ang kuwang aron ipasaka sa korte ang kaso batok sa amahan ug inahan ni Fatima.
Human mapasaka ang kaso sa fiskaliya, wala mopirma og waiver of detention ang mga ginikanan ni Fatima. Nagtuo sila nga kahatagan sila og higayon nga makapiyansa didto sa hukmanan tungod sa pagtabang ni Elmer.
Apan pagka ugma, miadto si Fatima sa police station aron makigsulti unta kang Elmer. Apan gitug-anan siya sa usa ka kaubang polis niini nga gi-floating si Elmer samtang giimbestigar.
Gikasulti ni Fatima ang opisyal nila ni Elmer. Nakahilak si Fatima pagkasayod nga wala gayud diay matabangi sila ni Elmer ug imposible nga makapiyansa sa ilang kaso ang iyang mga ginikanan.
“Mihatag ba kamo’g kuwarta ngadto kang PO2 Elmer?” matud sa opisyal sa polis. “Yes sir, P200 mil ang iyang gipangayo ug mihatag mi. Ang nakapait kay iya pa g’yud ko nga gideyt sa motel,” saysay ni Fatima.
“Ha? Salbahis nga polis!” nakatuaw ang opisyal. (Sumpayan)
- Latest
