Bilyako nga polis - gula 8

Alas kuwatro na sa hapon nga migawas sila si Elmer ug Fatima sa gisudlan nilang motel diha sa Barangay Careta. Nakasabot ang batan-ong polis nga kontra gusto g’yud ni Fatima ang nahitabo kanila.

“Timan-i ha, siguroa g’yud nga makapiyansa sila si papa ug mama? Daku baya kaayo ang gibayad namo nimo unya gipahimuslan pa nimo ko,” giingnan ni Fatima si Elmer sa dayon nila nga panagbuwag.

Misakay og taksi si Fatima ug gibiyaan ra niya si Elmer nga mipahimulos kaniya makaduha gayud ka higayon. Nahimuot kaayo ang batan-ong polis kay samtang napahimuslan niya ang anak-dalaga sa ilang dinakpang pusher, nakakuwarta pa siya og P200 mil.

Mibalik si Elmer sa police station. Naabtan niya ang iyang mga kauban nga nag-andam sa kaso nga ipasaka batok ni Victor ug sa asawa niini nga nakuhaan nila og daghang shabu.

Naglibog si Elmer kun unsay iyang himuon aron nga matabangan ang amahan ni Fatima nga makapiyansa. Nakahunahuna siya nga duolon ang ilang hepe aron hangyuon ug bahinan niya’g P50 mil sa iyang nakuwarta.

Tuod, gihuwat ni Elmer nga makahigayon siya nga walay makadungog sa ilang panagsulti ug sa ilang hepe. Giduol ni Elmer ang ilang opisyal samtang nanigarilyo kini sa likud sa police station.

Wala magliko-liko si Elmer. Gidaygan niya ang ilang hepe sa iyang tumong nga tabangan nila nga makapiyansa ang ilang dinakpan. Iyang gikuot ang P50 mil ug gitunol sa ilang hepe.

Apan sukwahi sa iyang gituohan, gikasab-an pag-ayo si Elmer sa ilang opisyal. (Sumpayan)