Bilyako nga polis

Gipahibalo ni Fatima ang iyang amahan nga dala na niya ang P200 mil nga gidemenda sa polis isip bugti sa pagtabang nga siya makapiyansa sa kaso bisan og daghang shabu ang nakuha gikan kanila.

“Sige Fatima, ikaw na ang bahala nga mohangyo sa polis aron makagawas kami sa bilanggoan. Wala’y problema kanang kuwarta kay dali ra kana nga makit-an,” matud sa amahan ni Fatima nga si Victor.

Diha nga migawas na si Fatima sa opisina, gisugat siya ni Elmer. “Naa na ba ang kuwarta? Adto ko paabota sa dapit nga atong gikasabotan,” matud sa batan-ong polis.

Wala’y tingug-tingog nga milakaw si Fatima paingon sa eskena Gorordo ug Cardinal Rosales Avenue. Wala danti og singko minutos, nalantawan na ni Fatima nga nagpaingon na sa iyang nahimutangan si Elmer.

Diha nga nagkatupad na sila, mipara dayon og taksi si Elmer. Didto sila milingkod sa luyo nga lingkoranan. “Sa Q6 lang mi bai,” giingnan ni Elmer ang drayber.

Nakasabot dayon ang drayber sa gisulti ni Elmer nga maoy ilang adtoan. Hilom kaayo sila si Elmer ug Fatima. Ingon sa gikulbaan pag-ayo ang dalaga tungod kay nasayod na siya kun unsa’y iyang dangatan sa mga kamot sa polis.

Kun dili pa tungod ug alang sa iyang mga ginikanan nga makagawas kini sa bilanggoan dili niya ibaylo ang iyang kadungganan niini’ng iyang pag-uban kang Elmer.

Pipila ka gutlo, misulod na ang taksi sa motel. (Sumpayan)