Siya ug ako sa kangitngit - Gula 37

Si Venus maoy una ko’ng gikasuod kay nagpakita siya og kamahigalaon ngari nako. Kadali ra mi nga nagkasuod.

Pagkaudto, nagdungan mi’g kaon. Diha ra mi mangaon sa luyo’ng bahin sa tindahan. Libre man mi’ng mga trabahante sa pagkaon alang sa paniudto.

“Hain ka man diay magpuyo ron?,” gipangutana ko ni Venus samtang nangaon mi. “Mao kana ang akong problema ron,” nako pa.

Ako nga gisaysayan si Venus. “Kagabii lang ko miabot dinhi sa Talibon gikan sa Alicia. Mi-check in ko sa usa ka hotel. Tua didto ang tanan ko’ng mga gamit.”

“Nganong nagpahotel-hotel ka man? Kamahal og bayad niana?” matud ni Venus.

“Wa man gud ko’y kabanay nga kadangpan dinhi. Mao nga bisan igo-igo ra ang akong kuwarta, napugos ko pag-check in sa hotel. Kaganina’ng buntag nangita na unta ko’g balay nga kaabangan. Sa tanto nakong subay-subay sa kadalanan, nahiagi ko ning maong tindahan. Nakita ko sa karatola nga nagkinahanglan mo’g tindera.

Wala na lang ko mopadayon pagpangita og balay nga kaabangan ug misulay ko pagpangaplay. Maayo gani kay nadawat ko,” matud ko.

“Unya, asa ka man mopauli karong gabii? Kun gusto ka, adto na lang ta sa akong gipuy-an. Total, wala man sab ko’y kauban didto sa kuwarto nga akong giukopar,” ni Venus. (Sumpayan)