Panumpa nga bakak

Gula 6

Paspas kaayo ang pagligid sa mga adlaw. Sabado na ug wala’y trabaho si Jeffrey. Naglaum si Jeffrey nga dili unta mausab ang huna-huna ni Janeth ug modayon kini sa ilang gikasabotan nga magkita niini’ng adlawa.

Wala g’yud masayop si Jeffrey kay niana’ng pagka udto mi-text kaniya si Janeth ug nagpahibalo nga dili lang usa nila idayon ang ilang panagkita kay giimbitar siya sa iyang mga amiga nga mag-night swimming.

“Sori kaayo Jeff ha, di man gud magpabalibad ang akong mga barkada kay hapit na kuno ang bakasyon ug magkabuwag-buwag na mi hapit,” pasabot ni Janeth sa iyang amigo.

Mura’g kalit lang naluya si Jeffrey nga nakabasa sa balibad ni Janeth. Naghinam-hinam na g’yud unta siya nga magkauban sila karong adlawa kay sukton na niya ang dalaga kun may paglaum ba siya sa iyang pagpanguyab.

Wala tubaga ni Jeffrey ang text ni Janeth. Nakahuna-huna na lang siya nga matulog kay puslan man nga dili madayon ang ilang pagpanuroy ni Janeth. Apan wala pa gani siya makatagpilaw, mitingog ang message alert sa iyang cellphone.

Gipasagdaan lang ni Jeffrey ug wala tan-awa kun kinsa ang mi-text kaniya. Luya ang iyang panglawas. Apan mitingog na usab ang message alert. Nangagho si Jeffrey ug napugos sa pagkab-ot sa iyang cellphone.

Duha ka text message gikan ni Janeth. “Suko ka nga di madayon ang atong deyt Jeff?” Ang ikaduha nga text nagkanayon “Kun oki ra nimo Jeff, kuyog ta nga mag-night swimming kay wala man ‘sab ko’y partner, sila duna man.”

Kalit lang milagsik ang lawas ni Jeffrey ug gireplayan dayon si Janeth. Iyang gitangdo nga mokuyog siya sa night swimming ug moamot siya’g litson. (Sumpayan)