Regalo ni Sr. Santo Niño

Wala pa gayud tugahi’g anak sila si Meldred ug Clifford. Pero wala sila magpakawa sa paglaom, labina nga padayon ang ilang pag-ampo sa ilang devoto Sr. Santo Niño. Bahin ni Clifford usa ka taxi driver. Si Meldred naa ra sa panimalay. Unya matag Domingo mosimba gyud sila.

Pagka buntag namasahero si Clifford sa inabangan niyang taxi. Ug gisuwerte siya, kay dako’g kita. Human sa iyang pagpamasahero mipauli si Clifford sa ilang balay.

Dihang duol na sa ilaha, kalit lang may naglagobo sa lingkuranan sa likod. Nahaigking si Clifford, kay may bata na nga sakay nga mapahiyumon.

“Dong, kinsa ka?” matud ni Clifford. “Nganong kalit ka man nibutho....?”

“Dili na importante ang kalit nako nga pagbutho! Basta padayon sa pagsimba matag Domingo!” sa bata.

Human sa pagsulti sa bata daling gilingi ni Clifford sa likod nga lingkuranan sa taxi. Apan nahanaw sa iyang panan-aw.

Wa magdugay naabot na sa ilang panimalay si Clifford. Ug nagpahibalo na si Meldred nga nagdigwa-digwa na siya. Unya niadto sila sa doktor ug wala sila mapakyas kay mabdos si Meldred.

Pagka Domingo niadto sila sa siyudad sa Sugbo aron mosimba. Didto sa simbahan, may nakita si Clifford nga bata nga naa sa atubangan ug naminaw sab sa wali sa pari, hangtud nga nisulti ang pari nga ipakita nato ang atong panag-inigsuonay. Nahipugwat si Clifford, kay ang bata nga naa sa atubangan mao man ang bata nga nakita niya sa taxi nga kalit nibutho sa likod nga lingkuranan. Unya nilakaw lang sab dayon.

Human sa misa nilibot sila makadiyot sa sulod sa simbahan pamasin makita pagbalik ang talagsaong bata. Apan sa kalit lang nanglurat ang mga mata ni Clifford tungod kay ang rebulto ni Sr. Santo Niño nga iyang nakita nga duol sa iyang gibarogan mao man ang susama’g dagway nga nakita niya kaganina. Ug nahibulong si Meldred nga puwerting nakatutok sa maong rebulto ang iyang bana.

“Clifford, nganong nangsiga man ang imong mga mata?”

“Dili mahitabo nga masipyat ko! Siya ang bata nga kalit nibutho sa taxi ug niyango-yango sa pagsimba kaganina...!”

“Clifford, nakaagpas na ko ... kining pagsimba nato matag Domingo gikalipay niya,” matud ni Meldred. “Kining akong gimabdos...mao kini ang regalo ni Sr. Santo Niño...” (Katapusan)