Tambaluslos nga nagtuwad

Sagol iniktin ang linaktan ni Christopher nga nag-iwag sa dala niyang espat sa dalan nga gisubay niadtong orasa nga lawom na ang gabii. Nagbati naman gud ang iyang asawang si Delia ug manganakay na sa una nilang liwat.

Sungkuon niya ang tigulang mananabang sa ilang baryo sa Kanturapak nga nagpuyo sa sudlunong sityo gikan sa dalan nasyonal. Ang iyang tatay Ernie ug nanay Nancy maoy gikauban ni Delia sa ilang balay nga halayo sa mga silingan. Naandan man gud sa ilang baryo Kanturapak nga mananabang ang sungkuon sa tanang manganakay, kay halayo man gud ang angkanan sa ilang lungsod.

Kalit nga gikulbaan si Christopher. Nagdangadanga na siya sa eskina paingon sa balay sa tigulang mananabang sa sityo Kang-ugingot. Naaninaw na niya ang nagdagtom nga dakong punoan sa akasya, nga nabalita sa ilang baryo nga abatanan o hamokan panahon sa kagabhion. Nabaniog nga daghan nang giabat ug gihamok og dili ingon nato diha sa dakong punoan sa akasya kun lawom na ang gabii.

“Sus, kun dili pa lang manganakay si Delia sa una namong liwat, di ko mangarisgar sa pagsungko sa tigulang mananabang, uy! Ginoo ko, ikaw nay bahala sa pagpanalipod nako batok sa mga abat ning gabhiona....!” nagkibutkibot ang baba ni Christopher. Hadlokan man gud siya nga magsuroysuroy panahon sa kagabhion, bisan sa ulitawo pa siya.

Nagkubakuba na gayud ang dughan ni Christopher dihang nahitungod na siya sa dakong punoan sa akasya. Kalit lang mihugpaas ang usa ka dakong sanga sa akasya nga nagyunyon sa dalan. Nahaatras si Christopher nga mipunting sa dala niyang espat sa nagyunyon nga sanga sa akasya. Nahatiurok siya sa iyang nakita. Usa ka linalang nga nagtuwad sa dakong sanga sa akasya ug nawalis ang baba niini, lahos na sa iyang dalunggan ug ulo nga ginuntan sa makapanlimbawot nga katawa. Tambaluslos nga nagtuwad!

Ug misutoy sa pagdagan si Christopher ngadto sa panimalay sa tigulang mananabang. Nahingangha si Iya Bulay sa pagkakita kang Christopher nga naghangos. “I-Iya Bulay...! Iya! M-maayong gabii! Nia ko kay manganakay ang akong asawa! Nagbati na si Delia...!” “O, nganong nangluspad man ka sa kahadlok, Christopher....?” “Gihamok ko’g tambaluslos sa dakong punoan sa akasya sa eskina Iya! Tambaluslos nga nagtuwad...!”

“A, mao ba? Ingon gyud ana kun manganakay ang imong asawa sa una ninyong liwat! Sulayan ka’s kahigayonan kun isog ba gyud ka! Tana, ayaw kahadlok. Bunga lang sa imong hunahuna ang tambaluslos nga nagtuwad....!” Diha gihapon ang kahadlok ni Christopher nga misunod sa tigulang mananabang balik sa ilang balay. Paghitungod nila sa dakong punoan sa akasya, wa gyu’y mihamok nga tambaluslos nga nagtuwad. Mingaw pa’s tirana ang dagkong punoan sa akasya! (Kataposan)