Guwapa nga piniriso - Gula 3

Gipresentar sa kapolisan ang mga polis nga midakop ni Jenny ug maoy miangkon nga nakasakmit og usa ka gamay’ng pakete sa shabu gikan sa dalaga. Nasabtan ni Samuel nga ang polis dili andam nga manubag sa pangutana sa abogado sa Public Attorneys Office (PAO) nga mihatag og legal assistance ni Jenny.

Wala gani magdugay ang prosecutor nga mihimo og direct examination ngadto sa mao nga polis ug nakita ni Samuel nga nagpanglingo-lingo kini nga nagtan-aw sa polis nga makikaw kaayo nga nanubag sa iyang pangutana.

“Tabangan tika nga makapiyansa Jen,” giingnan ni Samuel ang maanyag nga binilanggo nga mitindog na human nga giposasan pagbalik sa jailguard. Gibati og kaluoy si Samuel nga nagsud-ong kang Jenny. Wala siya makasabot nganong mibati siya’g kaluoy sa mao nga binilanggo nga karon pa man unta sila nagkaila.

Gihatod ni Samuel si Jenny paingon sa sakyanan sa Bureau of Jail Management and Penology (BJMP) nga maoy sakyan niini balik sa Cebu City Jail. “Huwaton na lang nato ang uban nga may hearing pa sa ilang kaso para dili na magbalik-balik ang sakyanan pagkuha nila,” matud sa jailguard.

Nahinangop si Samuel kay may kahigayonan pa nga magkasultihanay sila ug si Jenny. Nananghid si Samuel sa jailguard nga makigsulti siya sa gibantayan niini nga binilanggo. Wala modumili ang jailguard.

“Nag-unsa ka diay dinhi sa Palace of Justice? May kaila ka nga napriso?” pangutana ni Jenny kang Samuel. Wala limdi ni Samuel ang dalaga nga miadto siya sa Palace of Justice aron pagkuha og court clearance alang sa pagpangaplay pagkapolis.

“Taga diin ka diay Jen? Ngano nga wala ka man tabangi sa imong mga ginikanan?” sunod-sunod ang pangutana ni Samuel kang Jenny. Mitutok si Jenny kang Samuel. (Sumpayan)