Dili katuohan

Dear Tita Salie,

Have a wonderful day. Just call me Windy, still single ug naay boyfriend nga maoy hinungdan kun nganong nangayo ko sa imong advice.

Mag two years na among relasyon. Sa bag-o pa kaming nagkauyab mora’g dili maputol ang among pagsige’g text. Dili gyud mahimutang kun dili makateks. Malipayon kaayo mi sa una kun akong handumon ang among kaagi. Apan karon nausab na man siya diri nako. Wala siya’y trabaho anaa lang siya kanunay sa ilang house apan nganong dili na man siya makateks nako? Kun akong pangutan-on muingon ra man siya nga busy kuno siya sa ilang house.

Dili gyud katuohan nga ma-busy siya, Tita Salie, tungod kay naa ra man siya permi sa ilang house. Ako na lang kaha siyang bulagan? Palihug pasabta ko. Thanks.

* * *

My dear Windy,

Nindot gyud bitaw tinuod nga ang atong minahal anaa lang kanunay duol kanato ug atong ikaestorya kanunay. Kun ingon niini ang situwasyon kanunay gyud nga kulang ang oras alang sa duha nga nagkahigugmaay. Dili gyud mahuman ang estorya kay bisan unsay hisgotan kanunay gyud nga malipayon ang duha. Mao nga kun kini maputol, kun ang communication mausab ato na kining pangitaon tungod kay gusto nato kining ipadayon.

Matud mo anaa lang siya sa balay. So, kun anaa lang siya sa balay tataw lamang kaayo nga wala siya’y trabaho. Unya kun wala siya’y trabaho, of course, wala siya’y income. So, asa man sad siya’g kuwarta aron ipalit og load? Tingali kun dili na siya hatagan og kuwarta sa iyang parents aron dili siya magsalig ug maningkamot siyang mangita og trabaho.

Busa ayaw una paghunahuna og lain diha aron dili magsakit ang imong dughan. Pasagdi lamang una siya kay dinhi usab nimo makita kun unsa ka importante alang kaniya ang inyong relasyon. -- Tita Salie