Jezebel

Hangtod nga miabot ang higayon nga ang among gihisgotan ni James sa text bahin na sa gugma. Misangko hinuon kini sa pagpangulitawo ni James nako pinaagi sa text. Apan wala ko motuo sa gugmang iyang gipadayag nako pinaagi sa text. Nagtuo kong iya lang kong gibinuangan. Wala na ko mo-reply sa iyang text. Gi-off nako ang cellphone.

Pagkaugma, dihang gi-on na nako ang akong cellphone, daghang text messages nga misulod sa inbox niini. Pulos text gikan ni James ang misulod sa inbox. Sumpay sa iyang text nga wala nako tubaga ang iyang mensahe. Bahin sa gugma. Apan wala nako hatagi’g gibug-aton ang iyang text. Wala ko mo-reply niini.

Alang nako, imposibleng mahigugma si James nako. Nasayod siya sa akong kaagi. Dili ko angay niya tungod kay biktima ko sa rape. Gawas pa, adunahan sila. Dako kaayo ang gintang sa among kahimtang. Labaw sa tanan, dili ko niya ikapasigarbo tungod kay hugaw na ako nga pagka-babaye!

Gi-delete nako ang tanang text messages ni James sa inbox sa akong cellphone. Pagkahuman, miatubang ko sa salamin ug nangareglar sa makadiyot sa akong kaugalingon. Unya migawas ko sa akong kuwarto aron tabangan si manang Ester sa mga bulohaton sa kusina.

Naabtan ko si manang Ester nga nagkapuliki sa mga gimbuhaton sa kusina. – Sumpayan pa