Goodbye Maricel

Gula 3

“Sulagma kay nag-abot na ‘sab ta no? Pirmi ka na diay nga anhi mag-lunch Al?” gisukna ni Maricel si Albino samtang gidalitan niya’g matam-is kaayo’ng pahiyom ang ulitawo. Igo lang mipahiyom pagbawos si Albino ug giingnan si Maricel nga molingkod na lang sa giserba niya’ng lamesa para kanila.

Si Albino na ang midala sa mga pagkaon ngadto sa lamesa diin nagpaabot kaniya si Maricel. Dunay mga babaye sa pikas lamesa nga distansya’g gamay kanila nga mitimbaya ni Maricel, dayon nabantayan ni Albino nga gitutokan siya pag-ayo.

Human nila’g lunch, wala na g’yud sipyata pa ni Albino ang pagpangayo sa contact numbers ni Maricel. Gihatagan ‘sab ni Albino og business card ang maanyag nga amiga. Wala sila magdugay pagsultihanay kay hapit na ang ala una nga mobalik na si Maricel sa iyang opisina sa City Hall.

Gisundan ni Albino pagtan-aw si Maricel samtang naglakaw paingon kini sa City Hall gikan sa fast food restaurant. Nakabantay si Al nga may pagbati siya sa maanyag nga si Maricel. Pagbalik ni Albino sa iyang opisina, giteksan niya ang numero ni Maricel ug gitug-anan nga happy kaayo siya nga nagkaila sila.

Gabii na nga mi-reply kang Albino si Maricel ug mipasabot nga dili sila maka-text sa opisina kay gidili kini kanila ug adunay daghang CCTV camera nga makita sa ilang mga opisyal kinsa kadtong mga wala motuman sa lagda.

Gikan niadto, kanunay na sila nga magbayloay og text messages si Albino ug Maricel. Miabot ang panahon nga gidaygan ni Albino si Maricel sa iyang gibati apan pinaagi lang sa text message. “Ayaw pagdali-dali Al kay wala ka pa hingpit makaila kanako,” reply ni Maricel. (Sumpayan)