Wala gyod kakita

Dear Tita Salie,

Maayong adlaw. Tagoa lang ko sa ngalan loverboy, 24 years of age, ulitawo apan duna nay usa ka kabuok anak.

Aron masabtan nimo, Tita Salie, akong isaysay ang nahitabo. Duna koy hinigugma. Ug usa ka adlaw niana miteks diri nako ang inahan sa akong hinigugma ug nag-ingon nga buntis ang akong uyab.

Tungod lagi kay duna man koy tulobagon sa ilang anak miadto ko sa ilang panimalay. Apan pag-abot nako sa ilang balay gitabangan man hinuon ko nila og bun-og ug hapit pa ko mamatay.

Sukad niadto wala na gyud ko pakita didto sa akong uyab. Nasayod ko nga nanganak na siya apan hangtud karon nga upat na lang katuig ang milabay wala pa gyud ko kakita sa akong anak ug sa akong uyab.

Gusto nako silang makita apan nahadlok ko sa iyang pamilya. Unsay angay nakong buhaton? Palihug pasabta ko, Tita Salie. Thanks a lot.

* * *

Hi! Dako gyud seguro og kalagot ang pamilya sa imong uyab. Frustrated sila sa ilang anak tungod kay imo man kining gipabuntisan.

Dapat nimong masabtan nga ang mga ginikanan dako kaayo sila og panglantaw alang sa ilang mga anak. And since imo man gihilabtan ug napukan ang ilang mga pangandoy mao kini ang hinungdan sa ilang dakong kasuko nganha nimo. Busa ayaw una pagsulong ngadto sa ilang panimalay. Pangita og paagi nga imong ikaestorya ang imong hinigugma. Mangayo ka og number ngadto sa iyang mga higala o kaha mopada ka og note ngadto niya aron imo siyang masabot alang sa inyong sitwasyon. Ayaw kahadlok sa iyang pamilya, kay sa kadugayan ila rang madawat ang inyong gugma. – Tita Salie