Jezebel - Gula 30

Natay-og gyud ang akong abaga sa pagbakho. Niini, ingon sa nakamatikod si Edward nga naghilak ko. Mibangon siya ug gisuling ang akong nawong. Ingon sa nakugang siya dihang iyang nakita nga nagpatulo ko sa akong mga luha.

“Naunsa ka man?” Gipangutana ko niya.

Wala ko motingog.

“Nagbasol ka ba, Jezebel?” Laing pangutana ni Edward.

Igo lang kong milingolingo agi’g tubag sa iyang pangutana.

“Nakonsensiya lang ko, Edward,” matud ko nga inanay nang miundang paghilak. Nakasala ko nilang tatay ug nanay. Wala lang sila’y kasayoran nga may nahitabo na kanato karon. Nagmata lang sila’g buntag.”

“Ayaw na lang hasola ang imong kaugalingon sa paghunahuna niana. Dili ko man bitaw ka pasagdan kon magkinaunsa. Gawas pa, nagtuo kong makasabot nato ang imong mga ginikanan. Ang nahitabo nato karon mahitabo gayod sa tanang lalaki ug babaye nga nagkahigugmaay. Sulundon kini natong tanan.”

“Pero dili pa unta kini ang tukmang panahon, Edward.”

“U-unsay buot mong ipasabot?” Nakasukit si Edward.

Gipasabot ko si Edward sa tanan aron dili niya lainon pagsabot ang akong gisulti nga ang nahitabo kanamo wala sa tukmang panahon.

“Bugtong kong anak nila ni tatay ug nanay ug nasayod ka niana,” matud ko.

“Taas kaayo sila’g pangandoy alang nako. Gusto silang makatapos ko sa akong pagtuon. -Sumpayan pa