Ang playboy

Gula 5

Pagka gabii na, wala g’yud sipyata ni Caloy ang pag-adto sa Wild Orchids Bar sa dalan Sanciangko nga gitrabahoan ni Lowela. Gipangutana ni Caloy ang waiter kon miabot na ba si Lowela. Dugay nga nakaila ang waiter. 

Nakahuna-huna si Caloy nga malagmit, lain nga ngalan ang gigamit ni Lowela sa bar. “Taga Bohol gani na siya dong unya bag-o pa kuno siya nga nagtrabaho dinhi,” matud ni Caloy. Miliraw ang mga mata sa waiter nga nagpanghangad sa kisame. “Ah, si Daisy tingali ang imong gipasabot. Huwat-huwata lang sir, dia na kadto karon kay siya na man lang ang wala pa moabot.”

Miorder si Caloy og duha ka botelya nga beer ug nagkalingaw lang usa siya pagtan-aw sa mga dancer. Adunay customer nga miabot ug milingkod kini sa pikas lamesa nga nalat-angan lang og usa ka lamesa gikan sa giukopahan ni Caloy.

Wala madugay, nalantawan ni Caloy nga misulod na si Lowela sa bar. “Kana sir? Mao na’y imong gipasabot nga Lowela?” gipangutana si Caloy sa waiter. Igo lang miyango si Caloy kay nakita niya nga ang lalaki nga naglingkod sa pikas lamesa miwara-wara kini sa kamot ngadto ni Lowela.

Giduol sa waiter si Lowela. Nakasabot siya nga gitug-anan sa waiter si Lowela nga adunay nangita kaniya. Mitan-aw si Lowela kang Caloy. Mipahiyom si Lowela ug miduol kaniya.

“Dok, gitinuod g’yud nimo ang pag-ari da,” ni Lowela nga nagpahiyom apan mipasiklap sa pikas lamesa. Ang tawo sa pikas lamesa nagtutok kanila ni Lowela ug Caloy.

“Mao kana ang usa sa akong customer nga giingon nako nimo dok nga mamugos g’yud nga magdeyt mi, matagbaw ko’g balibad,” matud ni Lowela. “Mao ba? Kon mao kana, posible nga masuko na nako kay miduol ka man sa akong lamesa,” ni Caloy nga mipasiklap usab sa maong tawo.

Nananghid si Lowela kang Caloy nga mosayaw usa kay iya na nga turno sa pagsayaw.  (Sumpayan)