Daghang naglaom

Dear Tita Salie,

Maayong adlaw ug sa tanang staff sa Banat News. Ang akong problema mahitungod kini sa akong lovelife. Apan sa dili pa nako isaysay ang tanan palihog tagoa lang ko sa ngalan nga Kulapo.

Ulitawo pa ko ug ania nagpuyo sa Aloguinsan, Cebu. Sa akong pagka-ulitawo daghan kaayo ko’g nahimong hinigugma.

Sa akong pagka-chicksboy duna na ko’y anak apan nagbulag mi sa inahan sa akong anak. Duna koy mga uyab nga wala nako higugmaa, gusto lang nako nga mag-enjoy.

Ang problema kay wala sila masayod nga wala ko’y gugma kanila. Busa daghan gyud silang naglaom nako ug milaom sila nga pag-abot sa panahon ako silang minyoan.

Nasayod ko nga dili kini maayo, apan wala ko masayod kun unsaon aron mahunong ang tanan. Palihog pasabta ko. Daghang salamat.

* * *

Good day,

Tinuod nga nindot kaayo ang feeling sa atong lingaw-lingaw sa kinabuhi. Matud sa uban kinahanglan nga malingaw ta niining kalibotana kay dili na ta makabalik pa niining kinabuhia kon kita mawala na.

Apan dapat usab nimong hunahunaon kon ang ubang tawo malingaw usab nimo. Imong hunahunaon kon wala bay tawong makaluluoy diha sa imong paglingaw-lingaw. Matud pa sa imong giingon nga daghan kaayo ang naglaum kanimo nga imo silang minyoan pagdating ng panahon.

Dili ka ba diay maluoy niining mga babayhana nga maghilak kon ilang masayran nga naglingaw-lingaw ka lang ug dili tinuod ang imong gugma kanila.

Tinuod nga lumalabay lamang kita niining kalibotana. Ug kini nagpasabot nga atong buhaton ang tanan nga mga maayong buhat because we are created in the image and likeness of God. Atong paningkamotan nga nindot ang atong binuhatan aron malipay ang nagmugna kanato. -- Tita Salie