May uyab na
Dear Tita Salie,
Maayong adlaw. Ganahan gyud kaayo ko mobasa sa imong mga tambag ug daghan kaayo ko og makuha nga lessons ning imong column.
Tagoa lang ko sa pangalan nga Mr. M, 28 years old, ulitawo. Duna koy trabaho ug diri sa akong gitrabahoan duna ko’y babaye nga naibgan nga tagoon lang nato sa pangalan nga Tetzkie.
Ganahan kaayo ko niining bayhana, Tita Salie. Bisan unsa na lang ang akong ihatag kaniya aron gyud malipay siya bisan pa man kon mobalibad siya.
Dihang ako siyang gipanguyaban wala ko niya sugta ug iya kong giingnan nga may uyab na siya ug mao kini ang hinungdan nga wala ko niya sugta. Apan bisan iya kong giprangkahan wala gihapon ko mo-surrender sa akong gugma ngadto niya. Unsa may akong buhaton aron sugton ko niya? Palihog pasabta ko, Tita Salie. Thank you and more power.
* * *
Good day, Mr. M. Wala gyud kay laing mahimo sa imong sitwasyon gawas sa pagpaabot kon kanus-a niya dawaton ang imong gugma.
Akong nakita nga seryoso ang maong babaye sa iyang relasyon karon tungod kay iya gyud kining gisulti diha kanimo ug wala gyud kini niya i-deny. And since nahigugma man siya sa iyang boyfriend karon, maglisod pa gyud ka pagsulod didto sa iyang kasingkasing kay nakaserado pa kini.
Imo na lang hulaton kon makahulat pa ka nga moabli siya ug mo-entertain og laing mga admirer. Hinumdomi nga kon kamo gyud ang gitakda sa kahigayonan nga maoy magkadayon, moabot gyud ang panahon nga iyang paminawon ang hinagawhaw sa imong dughan. -- Tita Salie
- Latest