Kahoy’ng acacia
Human nila og snack, nangayo si Zeny og contact numbers ni Ben. Gi-phone book usab ni Ben ang contact numbers sa call center agent. “Sige Ben, mo-work na ko ha, thanks kaayo sa imong paghatod,” matud ni Zeny nga mapahiyumon. Mibalik si Ben sa giparkingan niya sa iyang motorsiklo. Dayon mipadayon si Ben sa iyang biyahe paingon sa Consolacion kay gusto niya nga mopahuway usa sa giabangan niya nga balay tungod sa kalapoy sa lawas.
Nahago g’yud kaayo si Ben sa pagpaninguha nga paspas apan luwas ang ilang biyahe ni Zeny kaganina ug dili ma-late ang dalaga sa iyang trabaho. Swerte lang si Ben kay paspas modagan ang iyang motorsiklo mao nga wala g’yud ma-late si Zeny.
Pag-abot ni Ben sa iyang gipuy-an, mideritso siya og higda. Dali ra siya nga nakatulog ug lapas na sa tungang gabii nga nakamata. Gipunit ni Ben ang iyang selpon kay nagsige kini og blink nga nagpasabot nga adunay text message nga wala mabasa.
Nasurpresa si Ben kay gikan ni Zeny ang tulo ka sunod-sunod nga text messages. Gitan-aw ni Ben ang oras sa pag-send sa message. Bag-o pa kini kaayo. Usa sa mga text message nagpasabot nga karon lang si Zeny naka-text kay ipa-deposit man ang ilang mga selpon kun anaa na sila sa work.
Na-entriga si Ben sa usa sa mga text message ni Zeny. “You’re so nice to me Ben, and I’m sure I’ll never forget you.” Gi-reply ni Ben ang message. “Labaw pa ko nga dili g’yud malimot nimo Zen, I admire your beauty.”
Kadto maoy sinugdanan sa ilang pagbayloay og mga text messages. Wala’y adlaw nga dili sila mag-text ug magbayloay og mga mensahe. Hulyo 12, mipauli si Ben sa ilang dapit sa Sibonga.
Didto pa masayri ni Ben nga si Zeny mipauli ‘sab diay sa ilang lungsod sa Boljoon kay nag-leave kini aron makatambong sa birthday sa iyang inahan. “Bisita diri sa among lugar Ben, maghuwat ko nimo,” ni Zeny sa iyang text message. (Sumpayan)
- Latest